Blŭ bi êdah klei čuăl mkă, k’iăng khua knŭk kna Trần Hồng Hà lač, klei čuăl mkă čar Phú Yên hŏng klei mĭn mđĭ kyar kjăp hlăm klei găl mrâo mđĭ kyar ngăn dŏ čŏng mâo lehanăn dhar kreh. Klei čuăl mkă anei jing kluôm mơ̆ng jih jang hdrăčuăl mkă, hlăm hdră êlan duh mkra doh mđrăm mbĭt hŏng dŭm čar nah dhŭng kwar krah lehanăn lăn dap kngư. Čiăng dưi bi sĭt klei čuăl mkă anei, k’iăng khua knŭk kna Trần Hồng Hà mtă kơ čar Phú Yên mă klei hriăm mơ̆ng dŭm alŭ wăl hlăm krĭng, lŏ dơ̆ng mlih mrâo hŏng klei mbruă, tui duah hdră êlan hjăn kơ pô kñăm čiăng dưi jing sa alŭ wăl duh bi liê năng tui ngă. Mơ̆ng klei čuăl mkă anăn, čar Phú Yên mâo bi mklă leh hdră êlan mđĭ kyar pô hlăm wưng ti anăp hlăm sa anôk kñăm; dua grông mđrĭng, 3 kmeh gơ̆ng, 5 bruă čuăn ruh mgaih phŭn čiăng dưi nga truh kơ thŭn 2030, Phú Yên dưi jing čar mâo klei đĭ kyar ênuk mrâo lehanăn kjăp.

Mă bruă hŏng čar Phú Yên, Khua bruă kƀĭn ala Vương Đình Huệ akâo kơ Đảng, bruă sang čư̆ êa lehanăn mnuih ƀuôn sang čar Phú Yên lŏ dơ̆ng ngă tŭ jing dŭm hdră mtrŭn mơ̆ng gưl dlông Đảng, bruă kƀĭn ala, knŭk kna, boh phŭn hŏng hnơ̆ng đĭ kyar, mghaih msir dŭm klei dleh kpăk kơ ênoh čuăn thŭn 2024 lehanăn kluôm bruă čuăl; čar tui duah hdră êlan mđĭ kyar, anăn jing dliê kmrơ̆ng, anôk ala, lehanăn dhar kreh.

Êlâo anăn, Khua bruă kƀĭn ala Vương Đình Huệ ngă bruă hŏng êpul khua kiă kriê bruă Đảng čar Khánh Hòa lehanăn ksiêm bi mklă kơ dŭm boh tŭ dưn bruă kđi čar thŭn 2023, hdră êlan mă bruă hlăm thŭn 2024 lehanăn ksiêm wĭt bruă hlue ngă hdră mtrŭn mrô 55 mơ̆ng anôk bruă kƀĭn ala kơ jih jang klei bhiăn hdră êlan mă bruă mơ̆ng čar Khánh Hòa lehanăn nao ti anôk bi êdah klei čuăl mkă alŭ wwăl ƀuôn prŏng mrâo Cam Lâm, Khánh Hòa.