VOV4.Êđê- Mprăp kơ hdră ksiêm dlăng bruă pŏk ngă hdră bhiăn hluê ngă mkiêt mkriêm, bi kdơ̆ng hŏng klei bi liê ti mang wưng thŭn 2016-2021, aguah 23/8, ti sang bruă kƀĭn ala, Khua bruă kƀĭn ala Vương Đình Huệ nao ti anôk mă bruă hŏng Phŭn bruă Ngăn prăk. Blŭ ti knăm anei, Khua bruă kƀĭn ala mtă kơ Phŭn bruă Ngăn prăk brei thâo săng klă kơ klei mkiêt mkriêm ngăn prăk amâo djŏ knŏng bi hrŏ klei bi liê prăk kăk ƀiădah brei hluê djŏ hdră bhiăn hluê ngă klei mkiêt mkriêm, bi kdơ̆ng hŏng klei bi liê ti mang. Hluê si klei hưn mơ̆ng Khua phŭn bruă Ngăn prăk Hồ Đức Phớc, mơ̆ng thŭn 2016 truh ară anei, dŭm anôk bruă hlăm Phŭn bruă ngăn prăk dưi mkiêt mkriêm êbeh 6 êbâo êklai prăk hlăm hdră čuăl, bi mklă, kriê dlăng, ba yua ngăn prăk knŭk kna. Tĭng truh thŭn 2021, Phŭn bruă Ngăn prăk bi hrŏ leh ênoh mnuih mă bruă mâo 106% hdră kčah, hrŏ 36 êpul bruă dôk 28 êpul bruă. Khua bruă kƀĭn ala mñă: hluê ngă klei mkiêt mkriêm, bi kdơ̆ng hŏng klei bi liê ti mang amâo djŏ grăp thŭn dưi mkiêt mkriêm dŭm ênoh prăk, ƀiădah yuôm hĭn jing ksiêm dlăng, ruh mtlaih klei dleh, gun kpăk, mjing hdră mtrŭn čiăng mđĭ boh tŭ yuôm./.

                                                    Pô mblang: H’Nêč Êñuôl