Lŏ dơ̆ng hlăm klei kƀĭn tal 36, Aguah mbruê 21/8, ti Sang bruă kƀĭn ala, ti gŭ klei gĭt gai mơ̆ng Khua bruă kƀĭn ala Trần Thanh Mẫn, Dhar bruă gĭt gai Bruă Kƀĭn ala ngă klei êmuh leh anăn wĭt lač klei êmuh bruă hluê ngă dŭm hdră mtrŭn mơ̆ng Dhar bruă gĭt gai Bruă Kƀĭn ala hlăm bruă ktuê dlăng leh anăn ksiêm êmuh mơ̆ng akŏ wưng păn bruă Bruă Kƀĭn Ala gưl 15 truh kơ jih thŭn 2023.

Blŭ hrăm hlăm gưl ksiêm êmuh, Khua bruă kƀĭn ala Trần Thanh Mẫn brei thâo, anei jing gưl tal êlâo hlăm wưng păn bruă Bruă Kƀĭn Ala gưl 15, Dhar bruă gĭt gai Bruă Kƀĭn ala ngă bruă lŏ wĭt ksiêm dlăng, bi êdah bruă klam mơ̆ng Dhar bruă gĭt gai Bruă Kƀĭn ala hlăm bruă ktuê dlăng truh hnơ̆ng bruă hluê ngă klei čuăn, klei hưn mdah mơ̆ng Bruă Kƀĭn Ala, Dhar bruă gĭt gai Bruă Kƀĭn ala. Hluê anăn hmao ruh mgaih, mđĭ hĭn bruă klam mơ̆ng dŭm anôk bruă tŭ klei ktuê dlăng. Khua Bruă Kƀĭn Ala đăo knang phung bi ala Bruă Kƀĭn Ala hŏng klei thâo mĭn, ai tiê rŭ mjing, duh myơr kơ knŭk kna, phung khua phŭn bruă, dhar bruă hlăm klei gĭt gai ktrâo lač, mgaih msir dŭm klei êdu kƀah, klei dleh dlan, kpăk gun. Phung khua êmua hlăm knŭk kna, phung khua dhar bruă lŏ dơ̆ng bi êdah ai tiê, klei gĭr hĭn, wĭt lač klă hĭn, djŏ mta knăm, ba mdah dŭm bruă klam, hdră êlan ngă tŭ jing dŭm bruă klam, mta kñăm mơ̆ng Bruă Kƀĭn Ala, knŭk kna ba mdah leh hlăm thŭn 2024 leh anăn hdră mtrŭn klei kƀĭn kluôm tal 13 mơ̆ng Đảng.