Blŭ hrăm hlăm Klei bi kƀĭn tal 44 mơ̆ng Dhar bruă kƀĭn ala, mphŭn pŏk hlăm aguah 14/4, Khua bruă kƀĭn ala brei thâo, srăng brei klei blŭ, ksiêm dlăng, bi mklă 42 êpul boh phŭn; mkra mlih, mbŏ dŭm mta mơ̆ng Hdră bhiăn phŭn thŭn 2013; ksiêm dlăng dŭm bruă hlăm klei dưi čiăng pral ruh mgaih klei dleh dlan, gun kpăk kơ dŭm Anôk bruă duh mkra. Boh nik, Dhar bruă kƀĭn ala srăng brei klei blŭ kơ hră mơar mtă: mkra mlih, mbŏ dŭm mta mơ̆ng Hdră bhiăn phŭn thŭn 2013; mkŏ mjing Knơ̆ng bruă čih mkra, mbŏ dŭm mta Hdră bhiăn phŭn thŭn 2013; mă klei blŭ mnuih ƀuôn sang kơ hră čih mkra mlih, mbŏ dŭm mta hlăm hdră bhiăn phŭn thŭn 2013 hlăm wang 1 mlan.

Khua bruă kƀĭn ala Trần Thanh Mẫn mñă klă, bruă mkra mlih  Hdră bhiăn phŭn jing bruă klam yuôm bhăn hŏng hnơ̆ng bruă prŏng, djŏ tuôm kơ bruă klam mơ̆ng lu anôk bruă, êpul bruă, mguôp hŏng hdră bi khuăt, mkŏ dăp êpul mă bruă kđi čar, hlue si klei Klah čŭn mrô 126, 127 mơ̆ng Phŭn bruă kđi čar leh anăn Anôk bruă gĭt gai Gưl dlông.  Hlăm wưng mkŏ mjing Klei bi kƀĭn, Dhar bruă kƀĭn ala brei bi leh bruă ksiêm dlăng, bi mklă dŭm hdră mtrŭn mkŏ dăp, lŏ mkŏ mjing anôk bruă knŭk kna gưl să, mbĭt anăn brei klei blŭ hưn hŏng Bruă kƀĭn ala bi mklă hdră mtrŭn bi mŭt dŭm anôk bruă knŭk kna gưl čar leh anăn bi leh  boh phŭn hlue si Hdră mă bruă Gưl 2 dưi bi leh.