Blŭ bi klă hlăm mmông mă bruă bruă, Khua bruă kƀĭn ala Trần Thanh Mẫn lač, Hải Phòng mâo lu klei găl, gưl dlông ba mdah leh lu hdră êlan yuôm bhăn mdưm tur knơ̆ng kơ klei đĭ kyar mơ̆ng ƀuôn prŏng hlăm wưng kơ anăp. Bi klă dŭm boh tŭ dưn mâo ƀuôn prŏng Hải Phòng dưi mâo leh hlăm bruă hluê ngă hdră mtrŭn mrô 35, êdah êdi jing bi mbŏ hnơ̆ng čuăn ngăn prăk, čuăl mkă mđĭ prăk mlan kơ knuă druh, phung mă bruă knŭk kna, khua Bruă Kƀĭn Ala lač klei anei bi klă kơ dŭm hdră êlan mơ̆ng Đảng, Bruă Kƀĭn Ala, knŭk kna jing găl guôp.

Hlăm wưng kơ anăp, Khua bruă kƀĭn ala Trần Thanh Mẫn lač ƀuôn prŏng Hải Phòng čiăng ksiêm dlăng dŭm hdră êlan mâo hlăm hdră mtrŭn mrô 35 čiăng mkra mlih, bi mbŏ msĕ si čiăng kdlưn hĭn srăng mâo mta kñăm, mâo mta phŭn čiăng đĭ kyar.