VOV4.Êđê -  Tŭ drông Dhar bruă mnia mblei tar rŏng lăn mơ̆ng Nghị Viện Ơrôp mơ̆ng Bernd Lange ba anăp hriê čuă leh anăn mă bruă ti Việt Nam, Khua bruă kƀĭn ala Vương Đình Huệ mñă klă, Bruă kƀĭn ala leh anăn dŭm anôk bruă djŏ tuôm ti Việt Nam mprăp klei bi mguôp hŏng Êpul hgŭm Ơrôp čiăng mtrŭt mjhar phung hgŭm mkăn hlăm EU bi klă leh anăn hluê ngă klei kuôl kă mnia mblei êngiê plah wah Việt Nam – EU (EVFTA).

Khua bruă kƀĭn ala Vương Đình Huệ lač, klei hriê čuă mơ̆ng Dhar bruă mnia mblei tar rŏng lăn mơ̆ng Nghị Viện Ơrôp mkŏ mjing hlăm wưng Việt Nam leh anăn EU mâo klei mjĕ giăm klă klơ̆ng hlăm djăp mta bruă kmeh gơ̆ng bruă kđi čar, bruă hŏng tač êngao, bruă duh mkra leh anăn dŭm mta bruă mkăn. Khua bruă kƀĭn ala Vương Đình Huệ mñă klă, EU lŏng dơ̆ng rơ̆ng bruă klam bi mâo klei êđăp ênang, hơĭt kjăp, klei êđăp ênang êlan êa ksĭ leh anăn êlan êdeh phiơr ti krĭng ksĭ ngŏ, bi kjăp hĭn klei mjĕ giăm Việt Nam hŏng Eu leh anăn dŭm ala čar hgŭm hlăm dŭm klei kƀĭn lu tĭng, lŏ mđĭ hĭn klei bi mguôp plah wah EU leh anăn ASEAN, boh nik jing mtrŭt mđĭ bruă klam mơ̆ng ASEAN ti krĭng ksĭ India – Pacific.

Y-Ƀel pô mblang