VOV4.Êđê- Tlam mbrue (19/5), ti sang Bruă kƀĭn ala, Khua Bruă kƀĭn ala Vương Đình Huệ drông čhưn leh Khua kiă kriê Êpul Grŭp Boeing hlŏng klam bruă Boeing tar rŏng lăn Michael Arthur. Khua bruă kƀĭn ala Vương Đình Huệ bi myuôm jih jang bruă mơ̆ng Boeing ti Việt Nam, bi đru klam bruă knuă êlan êdeh phiơr, boh nik dŭm anôk mkra mjing êdeh phiơr prŏng msĕ si Boeing kyua hmăi amâo mâo jăk mơ̆ng klei ruă tưp Covid 19, lehanăn đăo knang, leh dưi gang mkhư̆ klei ruă tưp, Boeing srăng lŏ dưi kơrŭ wĭt pral, boh nik hlăm alŭ wăl Ngŏ Dhŭng Asi, hlăm anăn mâo Việt Nam.

Khua bruă kƀĭn ala Vương Đình Huệ čang hmăng, Boeing pŏk klei găl pô ti Việt Nam, hơ̆k mơak lehanăn sa ai hŏng hdră mơ̆ng Boeing mkŏ mjing anôk ksiêm duah bruă mđĭ kyar, lehanăn đru hdră mă bruă ti Việt Nam, čiăng mâo ngă lu bruă đru mjuăt bi hriăm kơ bruă mkra êdeh phiơr, đăo knang kơ Việt Nam srăng jing anôk jăk pioh kơ Boeing bi leh bruă pô./.

Pô mblang: Y-Khem Niê