VOV4.Êđê - Aguah 16/5, ti sang bruă kƀĭn ala Lao, Khua bruă kƀĭn ala Lao Xay-xổm-phon Phôm-vi-hản mkŏ mjing leh Knăm drông klă sĭt Khua bruă kƀĭn ala Vương Đình Huệ. Leh knăm drông dua khua bruă kƀĭn ala mkŏ mjing klei kƀĭn trông. Dua khua bruă kƀĭn ala mñă klă, ti anăp klei dleh ktuê dlăng ară anei hlăm boh klei lu ala čar leh anăn krĭng wăl, dua tĭng ƀrư̆ ƀuh klă ênoh yuôm mơ̆ng bruă mđĭ lar leh anăn mđĭ klei hgŭm dua nah siă suôr hŏng klei êđăp ênang, mđĭ kyar dua ala čar Việt Nam leh anăn Lao, dlăng anăn jing klei bhiăn đĭ kyar leh anăn sa hlăm dŭm mta bi mklă rơ̆ng klei tŭ dưi bruă krŭ kdơ̆ng grăp ala čar. Hlăm wưng kơ anăp, dua tĭng mđĭ ktang klei bi trông êpul, bi tuôm plah wah Khua bruă kƀĭn ala leh anăn plah wah dŭm Knơ̆ng bruă kƀĭn ala dua ala čar, Êpul bruă kƀĭn ala, Êpul phung bi ala mniê bruă kƀĭn aka, Êpul phung bi ala bruă kƀĭn ala mda asei leh anăn Êpul gơ̆ng bruă ƀuôn sang gưl čar mơ̆ng dua ala čar, bi hgŭm mkŏ mjing klei bi kƀĭn kah mbha klei thâo hlăm dŭm mta bruă kƀĭn ala./.

H’Zawut pô mblang