VOV4.Êđê- Ti Sang bruă kƀĭn ala Ăngle, Khua bruă kƀĭn ala Vương Đình Huệ bi trông leh hŏng Khua Thượng viện Anh John Mcfall. Hlăm klei bi trông, dua khua gĭt gai mơak ƀuh, Việt Nam leh anăn Ăngle bi hgŭm tliêr kjăp hlăm klei bhiăn lu tĭng msĕ si Êpul hgŭm lu ala čar, Klei bi kƀĭn bi hgŭm Asi - Ơ Rôp (ASEM) leh anăn jar klei bi hgŭm ASEAN-Ăngle, Việt Nam nao ai hŏng Ăngle mđĭ hĭn klei bi hgŭm hŏng ASEAN leh anăn Ăngle nao ai hŏng bruă klam jing anôk phŭn mơ̆ng ASEAN leh anăn jing ala čar mkŏ yuôm bhăn plah wah Việt Nam hŏng EU.

Dua tĭng bi tŭ ư lŏ dơ̆ng mđĭ ktang klei bi trông Êpul gưl dlông, dŭm anôk bruă mơ̆ng Bruă kƀĭn ala, Êpul bruă kƀĭn ala bi hgŭm leh anăn phung mă bruă kƀĭn ala; bi trông klei thâo ngă bruă kƀĭn ala mơ̆ng grăp ala čar; mđĭ hĭn klei bi hgŭm ktuê dlăng leh anăn hlue ngă klei kuôl kă bi hgŭm Knŭk kna dua ala čar bi siñê, dŭm hdră bruă bi hgŭm; nao ai hŏng Knŭk kna, alŭ wăl, anôk bruă duh mkra leh anăn mnuih ƀuôn sang dua ala čar mđĭ ktang klei mjĕ êrô, mđĭ klei bi hgŭm bi hdơ̆ng thâo săng leh anăn bi hgŭm mâo klei tŭ dưn./.

                                               Pô mblang: H’Zawut Ƀuôn Yă