Blŭ ti knăm anei, Khua bruă kƀĭn ala Vương Đình Huệ brei thâo, ară anei ala čar drei mâo leh êpul ngă bruă duh mkra truh dŭm êklăk čô, dôk kriê dlăng êbeh 900 êbâo anôk bruă duh mkra, hlăm anăn 98% jing anôk bruă duh mkra êngao knŭk kna.

Khua bruă kƀĭn ala brei thâo, Đảng, Knŭk kna bi mni bruă klam mơ̆ng êpul anôk bruă duh mkra, phung mă bruă duh mkra hŏng hdră đĭ kyar mơ̆ng ala čar. Khua bruă kƀĭn ala mñă, hdră mtrŭn 41 mơ̆ng Phŭn bruă kđi čar kơ hdră mkŏ mkra lehanăn mđĭ lar bruă klam êpul mă bruă duh mkra hlăm wưng mrâo ba mdah leh klei mĭn, hdră êlan lehanăn hdră msir mrâo, djŏ hŏng klei čiăng đĭ kyar mơ̆ng phung mă bruă duh mkra lehanăn klei čiăng mơ̆ng ala čar. Kyua anăn, mđĭ kyar anôk bruă duh mkra dôk čiăng êpul phung mă bruă mâo klei thâo, mâo klei đua klam mơ̆ng ala ƀuôn hluê hdră mkŏ mjing, mjuăt bi hriăm knhuah dhar kreh, mđĭ lar boh tŭ yuôm knhuah gru djuê ana jăk siam mơ̆ng dŭm gŏ sang mă bruă duh mkra./.