Blŭ hrăm hlăm klei bi tuôm, Khua bruă kƀĭn ala Vương Đình Huệ mñă klă, thŭn 2023, hlăm dŭm boh tŭ mbĭt mơ̆ng Bruă kƀĭn ala, mâo klei hrăm mbĭt, đru mguôp yuôm bhăn mơ̆ng dŭm anôk bruă klei mrâo. Dŭm anôk bruă klei mrâo pral, čih djăp ênŭm, hmao kơ bruă ngă mơ̆ng Bruă kƀĭn ala hŏng phung bi ala kơ mnuih ƀuôn sang leh anăn yang ƀuôn kluôm ala; đru mđĭ klei thâo săng leh anăn klei nao ai mơ̆ng mnuih ƀuôn sang hŏng dŭm hdră mtrŭn mơ̆ng bruă kƀĭn ala; ba hdră bhiăn, hdră mtrŭn mơ̆ng bruă kƀĭn ala, Dhar bruă kƀĭn ala hnưm yua hlăm klei hdĭp.

Bruă klei mrâo ăt hmao lač kơ klei čiăng dŭm anôk bruă, phung bi ala kơ mnuih ƀuôn sang, yang ƀuôn truh hŏng Klei bi kƀĭn bruă kƀĭn ala leh anăn jing sa hdră đăo knang čiăng kơ yang ƀuôn ktuê dlăng bruă kƀĭn ala, phung bi ala bruă kƀĭn ala, klei bi blŭ hrăm dua nah. Khua bruă kƀĭn ala mtă kơ khua gĭt gai leh anăn kriê dlăng bruă klei mrâo lŏ dơ̆ng mđĭ klei thâo kđi čar; mđing hriăm mbŏ kluôm hnơ̆ng thâo phung ngă bruă čih klei mrâo năng hŏng bruă klam dưi jao, mđing bi hdơr 100 thŭn Hruê hră klei mrâo krŭ kdơ̆ng Việt Nam (21/6/1925 - 21/6/2025).