VOV4.Êđê -  Ƀri wưng yan mnga Nhâm Dần, tlam mmăt mbruê 21/1, dhar bruă gĭt gai bruă kƀĭn ala mkŏ mjing leh klei bi tuôm hŏng phung khua gĭt gai bruă kƀĭn ala êlâo, phung khua kiă kriê dhar bruă gĭt gai bruă kƀĭn ala dŭm gưl.

Hlăm ai êwa hơ’uh mđao hlăm mmông bi tuôm, Khua bruă kƀĭn ala Vương Đình Huệ lač jăk kyua klei uêñ mĭn, mđĭ ai, klei đru mguôp mơ̆ng phung khua gĭt gai bruă kƀĭn ala êlâo, phung khua kiă kriê dhar bruă gĭt gai bruă kƀĭn ala dŭm gưl brei kơ êpul bi ala bruă kƀin ala gưl 15. Khua bruă kƀĭn ala Vương Đình Huệ hưn mdah boh tŭ hlăm thŭn mă bruă tal êlâo, wưng păn bruă kƀĭn ala gưl 15 mâo nanao klei čŏng ngă bruă, mâo bruă klam, ngă bruă mjêč, bi lar klei bi mguôp, klei thâo mĭn, nao mbĭt hŏng ai êwa klei hdĭp, hmao ba dŭm boh klei hlăm bruă duh mkra – ala ƀuôn hlăm dŭm klei kƀĭn čiăng ksiêm dlăng, bi klă. Hmao ngă lu bruă prŏng hlăm bruă čih mkra klei bhiăn, ksiêm dlăng leh anăn bi klă dŭm boh klei yuôm bhăn hlăm ala čar.

Y-Ƀel pô mblang