Khua kiă kriê bruă knŭk kna ala čar China Vương Hộ Ninh bi mni kơ Khua bruă kƀĭn ala Vương Đình Huệ nao čuă ala čar China gưl tal êlâo hŏng bruă păn mrâo. Dua čô khua gĭt gai tŭ ư bi êlam hĭn klei bi mguôp plah wah mặt trận čar kwar Việt Nam leh anăn Bruă knŭk kna ala čar China, mđĭ hĭn klei bi trông čiăng bi lar jăk hĭn, tŭ dưn hĭn bruă klam mơ̆ng grăp êpul êya hlăm klei hdĭp kđi čar grăp lăn čar.

Khua bruă kƀĭn ala mñă kơ dua tĭng mtrŭt mđĭ klei bi mguôp mnia mblei hŏng êlan bi kna, kjăp, mđĭ hĭn klei bi mguôp, mkŏ dŭm mta bruă êlan klông, êlan êdeh treng, mtrŭt mjhar dŭm knơ̆ng bruă China duh bi liê hnơ̆ng prŏng hĭn, mâo hnơ̆ng tŭ jăk, êdah êdi kơ klei đĭ kyar mơ̆ng China, mkŏ mjing dŭm mta bruă kơ klei mjĕ mjuk, bi tuôm phung êdam êra, klei kƀĭn mnuih ƀuôn sang, mjĕ mjuk plah wah phung khua êmua mơ̆ng mặt trận čar kwar Việt Nam leh anăn bruă knŭk kna ala čar China msĕ si bruă công đoàn, bruă phung mniê.

Hlăm hdră nao čhưn ti China mơ̆ng Khua Anôk bruă kƀĭn ala Vương Đình Huệ, aguah hruê 9/4, ti Bắc Kinh, Knơ̆ng bruă Êlan phiơr Việt Nam (Vietnam Airline) mkŏ mjing leh Knăm bi hdơr 30 thŭn êlan phiơr lehanăn drông gưl phiơr tal 100.000 ti ktuê êlan phiơr Việt Nam – China. Hlăm 30 thŭn êgao, leh pŏk gưl phiơr ti China, Vietnam Airlines mâo leh 100.000 gưl phiơr, mdiăng êbeh 11 êklăk čô lehanăn 166 êbâo ton mnơ̆ng dhơ̆ng. Năng mđing, găn klei dleh dlan mơ̆ng Covid-19, Vietnam Airlines jing sa hlăm dŭm knơ̆ng bruă êlan phiơr tal êlâo lŏ pŏk gưl phiơr hŏng China lehanăn krơ̆ng kjăp hdră mtrŭt mđĭ bruă êlan phiơr, hiu čhưn ênguê leh klei ruă dưi ksiêm dlăng kjăp. Ti knăm anei, Vietnam Airlines lehanăn dŭm ƀĭng hgŭm mơ̆ng China bi mklă leh hdră bi hgŭm dŭm gưl phiơr plah wah Việt Nam lehanăn China./.