Dŭm klei čih klei mrâo mơ̆ng phung hgŭm hlăm Êpul hgŭm bruă Phung mniê ngă bruă klei mrâo Việt Nam mâo boh tŭ, čih hưn klă kơ klei hdĭp, đru hlăm bruă mlih mrâo, mđĭ kyar ala čar, lu klei čih mâo klei pah mni hlăm dŭm klei bi lông bruă klei mrâo mơ̆ng dŭm alŭ wăl, Phŭn, Dhar bruă, êpul lĭng kahan leh anăn klei bi lông bruă klei mrâo ala čar. Blŭ hlăm mmông bi tuôm, Khua bruă kƀĭn ala Vương Đình Huệ mñă klă, Bruă kƀĭn ala dŭm gưl dlăng yuôm bhăn bruă klam mơ̆ng bruă klei mrâo, boh nik jing dŭm anôk bruă mnuih ƀuôn sang đăo knang mơ̆ng gưl dlông truh kơ alŭ wăl mâo pô bi ala dŭm anôk bruă klei mrâo.

Hlăm wưng kơ anăp, Khua bruă kƀĭn ala ăt mtă kơ phung ngă bruă klei mrâo ala čar drei srăng lŏ hyuă kjăp, bi êlam hĭn klei mĭn, klei mrâo jing dhŏng kgă ƀơ̆ng, jing mnơ̆ng yua phŭn mơ̆ng Đảng hlăm bruă klei mĭn. Ƀri wưng anei, Khua bruă kƀĭn ala hơêč hmưi kơ phung mniê ngă bruă klei mrâo leh anăn Êpul hgŭm bruă klei mrâo mniê Việt Nam “dôk nanao ti thŭn 20” msĕ hŏng ai tiê mơ̆ng pô djiê êngiă, Aê mdrao Đặng Thùy Trâm, mâo nanao ai tiê jăk, čih djŏ leh anăn klă klơ̆ng jing dŭm knuh mnga hŏng msei.