VOV4.Êđê- Tlam mbruê, Khua bruă kƀĭn ala Vương Đình Huệ mâo leh mmông tŭ drông leh anăn blŭ hrăm hŏng khua bruă kƀĭn ala Campuchia Samdech Heng Samrin, ƀri wưng hriê čuă ala čar Việt Nam. Khua bruă kƀĭn ala Vương Đình Huệ mñă klă, Việt Nam dlăng yuôm bhăn leh anăn mkăp tal êlâo hĭn kơ klei mđĭ hĭn klei mjĕ giăm ala čar riêng gah jăk siam, bi hgŭm, bi mguôp kjăp leh anăn sui hŏng Campuchia, ăt msĕ hŏng klei 2 bi mguôp 3 ala čar Việt Nam – Lào – Campuchia.

Khua bruă kƀĭn ala Vương Đình Huệ lač, čiăng mtrŭt mđĭ leh anăn mđĭ kyar bruă duh mkra ala ƀuôn, 2 tĭng čiăng hnưm bi klă klei kuôl kă mnia mblei ti krĭng kbông lănm hluê ngă hră bi hdơr kơ klei mđĭ kyar leh anăn mkŏ bruă mnia mblei ti knông lăn, hluê ngă mâo boh tŭ dưn klei kuôl kă mtrut mđĭ klei duh bi liê leh anăn klei kuôl kă ñĕ đuê̆ klei mă bruă jia 2 blư̆. Bruă kƀĭn ala 2 ala čar hrăm mbĭt mkŏ mjing klei găl kơ dŭm knơ̆ng bruă bi mnia mblei. Việt Nam srăng lŏ mtrŭt mjhar dŭm knơ̆ng bruă duh bi liê ti Campuchia.

     Pô mblang: Y-Khem Niê