VOV4.Êđê- Tlam 19/7, ti sang bruă kƀĭn ala, Khua bruă kƀĭn ala Vương Đình Huệ drông Khua Knơ̆ng prăk Dlông rŏng lăn (WB) Axel van Trotsenburg, ƀri gưl hriê mă bruă ti Việt Nam mơ̆ng hruê 17 - 19/7. Khua bruă kƀĭn ala Vương Đình Huệ mñă klă, WB jing sa ƀĭng hgŭm yuôm bhăn leh anăn đăo knang đru leh jăk čiăng Việt Nam hlue ngă hdră kñăm mđĭ kyar hơĭt kjăp.

Ti COP26, Việt Nam ba mdah leh klei ƀuăn rơ̆ng ktang truh thŭn 2050 ba hnơ̆ng tuh djah djâo ti hnơ̆ng 0. Anei jing klei ƀuăn rơ̆ng msĕ hŏng dŭm ala čar Ơ Rôp, bi êdah ai tiê jăk leh anăn đua klam mơ̆ng Việt Nam hŏng êpul êya dlông rŏng lăn. Khua Knơ̆ng bruă WB brei thâo, WB mđĭ thiăm 60% ênoh prăk ƀuăn rơ̆ng bi hgŭm hŏng dŭm ala čar wưng êdei Covid-19 đĭ truh 200 êklai USD.

Klei đru anei čiăng kơ dŭm ala čar dưi mdrơ̆ng pral ti anăp klei rŭng răng, mbĭt anăn mâo hnơ̆ng trah dlăng sui mđing truh hdră kñăm mđĭ kyar sui leh anăn hơĭt kjăp./.

Pô mblang: H’Zawut Ƀuôn Yă