VOV4.Êđê - Ti sang bruă kƀĭn ala, Khua bruă kƀĭn ala drông leh Khua knŭk kna Malaysia Dato’ Sri Ismail Sabri bin Yaakob hriê kkuh ƀri wưng dôk čhưn ti Việt Nam.Ti knăm anei, Khua bruă kƀĭn ala Vương Đình Huệ h’êč hmưi lehanăn bi mni kơ gưl hiu čhưn tal êlâo mơ̆ng Khua knŭk kna Malaysia truh ti Việt Nam đru mjing boh kdrŭt lehanăn ngă bi êlam hĭn klei bi mjĕ ƀĭng hgŭm phŭn. Khua bruă kƀĭn ala bi mni kơ boh tŭ hdră bi trông ba wĭt leh klei tŭ dưn mơ̆ng 2 Khua knŭk kna, ăt msĕ mơh bruă dua ala čar dưi mâo leh klei kuôl kă mrâo, hlăm anăn mâo klei kuôl kă bi hgŭm mă bruă lehanăn bi hgŭm bruă hdră bhiăn; mtă kơ knŭk kna dua ala čar pŏk hluê ngă hnưm dŭm hdră msir hgŭm bruă čiăng pral lŏ krŭ wĭt lehanăn mđĭ kyar bruă duh mkra – ala ƀuôn, čang hmăng knŭk kna Malaysia lŏ dơ̆ng mjing klei găl kơ mnuih mă bruă Việt Nam ti Malaysia. Khua bruă kƀĭn ala Vương Đình Huệ mñă klă, anôk bruă kƀĭn ala Việt Nam ăt bi myuôm lehanăn sa ai đru mguôp hlăm hdră mđĭ kyar klei bi mjĕ ƀĭng hgŭm phŭn hŏng Malaysia; mtă kơ anôk bruă kƀĭn ala dua ala čar bi trông, mđing truh kơ bruă lŏ mâo klei kuôl kă hgŭm bruă mrâo mbĭt anăn mđĭ hĭn hdră bi trông hluê êpul lehanăn bi mjĕ mjuk phung khua êmua kñăm kah mbha klei thâo kơ bruă čih mkra klei bhiăn, mđĭ klei thâo săng, đăo knang hdơ̆ng găp./.

H’Nêč pô mblang