VOV4.Êđê- Tlam mmăt mbruê 30/5, ti sang bruă kƀĭn ala, Khua bruă kƀĭn ala Vương Đình Huệ drông leh pô bi ala mơ̆ng Angle ti Việt Nam Gareth Ward. Hlăm mmông  drông, Khua bruă kƀĭn ala Vương Đình Huệ yap yuôm bhăn klei đĭ kyar jăk siam hlăm klei bi mguôp, mjĕ giăm plah wah bruă kƀĭn ala Việt Nam leh anăn Nghị Viện Angle hlăm dŭm thŭn êgao. Dua tĭng rơ̆ng kjăp bruă bi trông êpul, klei bi tuôm, ksiêm êmuh hlăm dŭm klei kƀĭn lu tĭng, boh nik hlăm klei kƀĭn êpul hgŭm Nghị Viện tar rŏng lăn (IPU), klei kƀĭn trông ƀĭng hgŭm Nghị Viện Asi – Ơrôp (ASEP).

Mñă klă klei bi mguôp mâo boh tŭ dưn plah wah bruă kƀĭn ala 2 ala čar mjing mta phŭn yuôm bhiăn đru mtrŭt mđĭ klei bi mguôp hdră êlan Việt Nam – Angle, Khua bruă kƀĭn ala Vương Đình Huệ hmăng hmưi, pô bi ala Gareth Ward srăng lŏ jing kdrông kơ klei đĭ kyar klei mjĕ giăm plah wah bruă kƀĭn ala 2 ala čar, ba mdah dŭm hdră êlan bi mguôp mđing truh kơ 50 mkŏ mjing klei mjĕ giăm bruă hŏng tač êngao plah wah 2 ala čar ti thŭn 2023.

Pô mblang: Y-Ƀel Êban