VOV4.Êđê- Aguah mbruê 10/10, ti sang bruă kƀĭn ala, ti gŭ klei gĭt gai mơ̆ng Khua bruă kƀĭn ala Vương Đình Huệ, klei kƀĭn tal 16 mơ̆ng Dhar bruă gĭt gai bruă kƀĭn ala dưi kčưm pŏk. Mkŏ mjing hlăm 3 hruê, hlăm klei kƀĭn anei, Dhar bruă kƀĭn ala srăng brei boh blŭ kơ dŭm mta phŭn yuôm bhăn hưn mdah hŏng bruă Kƀĭn ala hlăm klei kƀĭn tal 4, bruă kƀĭn ala gưl 15, mĭn tĭng mkŏ mjing mơ̆ng hruê 20/10 anăp anei. Pŏk klei kƀĭn, Khua bruă kƀĭn ala Vương Đình Huệ lač klă dŭm mta phŭn yuôm bhăn hlăm klei kƀĭn anei, Dhar bruă gĭt gai bruă kƀĭn ala srăng brei boh blŭ kơ klei hưn mdah mơ̆ng knŭk kna kơ bruă duh mkra – ala ƀuôn leh anăn ngăn prăk knŭk kna.

Ti anăp klei dleh dưi ksiêm dlăng mơ̆ng bruă duh mkra tar rŏng lăn, bi kơ hlăm ala čar, êngao kơ dŭm klei găl, ăt mâo lu klei dleh kpăk, klei lông dlăng, kyuanăn, čiăng bi klă grăp čô, klei hriăm, boh nik jing klei mĭn kơ mta kñăm, hdră êlan thŭn 2023, mñă kơ Dhar bruă gĭt gai bruă kƀĭn ala hyuă kjăp ai tiê klei kƀĭn trông gưl dlông 6, dlăng kơ boh sĭt hdră êlan mkra mlih prăk mlan, prăk mlan leh jih thŭn mă bruă, ênua yang ƀuôn leh anăn klei đru kơ phung mâo bruă tŭ dưn hlăm thŭn 2023 čiăng ksiêm dlăng, bi klă.

Pô mblang: Y-Ƀel Êban