VOV4.Êđê - Nga dŭm bruă mơ̆ng Êpul bruă Đảng hlăm bruă kƀĭn ala thŭn 2022, tlam mbrue (29/3), ti sang bruă Kƀĭn ala, Khua bruă kƀĭn ala Vương Đình Huệ kiă kriê leh bruă mơ̆ng Bruă Đảng bruă kƀĭn ala mă hŏng Êpul kiă kriê bruă Đảng čar Khánh Hoà. Ti anôk mă bruă anăn, Êpul bruă Đanr mơ̆ng bruă kƀĭn ala hmư̆ leh klei hâo mdah mơ̆ng Êpul khua kiă kriê bruă Đảng čar Khánh Hoà bi êdah kơ klei hlue ngă hdră mtrŭn mrô 09 hrue 28/1 mơ̆ng Phŭn bruă kđi čar kơ klei rŭ mdơ̆ng, mđĭ kyar čar Khánh Hoà truh kơ thŭn 2030, lehanăn tă hdră truh kơ thŭn 2045, lehanăn hlue ngă jih jang hdră mtrŭn mơ̆ng Bruă kƀĭn ala hlăm klei duh mkra ala ƀuôn hlăm čar Khánh Hoà. Hdră mtrŭn mơ̆ng phŭn bruă kđi čar čoh čuăn kơ 10 mta bruă kñăm rŭ mdơ̆ng čar Khánh Hoà truh kơ thŭn 2030 jing ƀuôn prŏng kơ gưl dlông, hŏng klei dưn yua jih klei găl kơ êa ksĭ, jing ƀuôn prŏng thâo mĭn, kjăp, jiă knhuah gru dhar kreh, lehanăn mâo klei bi mguôp hŏng tač êngao, jing anôk đĭ kyar pral jing anôk phŭn kơ krĭng ktuê hang ksĭ kwar Krah, Lăn Dap Kngư lehanăn kluôm ala kơ klei duh mkra êa ksĭ. Ti anôk mă bruă, phung bi ala mâo leh klei blŭ, đru mguôp kơ dŭm hdră êlan mđĭ kyar čar Khánh Hoà, boh nik mkŏ mjing klei bhiăn bi kjăp jih jang bruă čuăn rŭ mdơ̆ng čar Khánh Hoà truh thŭn 2030, lehanăn tă hdră truh kơ thŭn 2045./.

Y-Khem pô mblang