VOV4.Êđê - Aguah mbruê, Khua bruă kƀĭn ala Vương Đình Huệ lehanăn êpul mă bruă mơ̆ng Gưl dlông nao ksiêm dlăng leh bruă hluê ngă Hdră mtrŭn mơ̆ng anôk bruă kƀĭn ala hŏng hdră êlan êran pral Bến Lức - Long Thành lehanăn tač êdeh phiơr Long Thành.

Khua bruă kƀĭn ala lač, tač êdeh phiơr prŏng Long Thành dưi dlăng jing sa hdră bruă prŏng êdi mơ̆ng lăn čar, tĭng srăng dưi ba yua hlăm thŭn 2025, mâo čang hmăng srăng jing sa hlăm dŭm anôk bruă dŭ mdiăng êlan phiơr mrâo mrang mrô sa ti krĭng Ngŏ Dhŭng Asi. Čiăng ngă leh djŏ hdră kčah, Khua bruă kƀĭn ala mtă kơ Đồng Nai mđing msir mghaih klei kơ anôk ala, ba jao kơ phung duh bi liê, mkăp hră dưi djă yua lăn, mđing mkŏ mkra anôk bruă nah gŭ. Mđing mjuăt bi hriăm bruă čiăng mnuih ƀuôn sang mâo klei găl hlăm bruă tui duah hdră duh ƀơ̆ng, rơ̆ng dưi mâo hnơ̆ng hdĭp bi knar amâo dah đĭ hĭn mkă hŏng anôk dôk hđăp./.

H’Nêč pô mblang