Ƀri gưl bi hdơr 69 thŭn hruê Phung aê mdrao Việt Nam, aguah 20/2, Khua bruă kƀĭn ala Vương Đình Huệ nao čhưn leh anăn mă bruă hŏng Phŭn bruă mdrao mgŭn. Khua bruă kƀĭn ala čih yap, Phŭn bruă mdrao mgŭn kƀĭn kčĕ kơ Knŭk kna hưn mdah hŏng Bruă kƀĭn ala mâo mtrŭn Hdră bhiăn ksiêm mkă mdrao klei ruă (lŏ mlih mrâo).

Anei jing gru kruăk knăl, klei bi mklă kơ klei đĭ kyar mơ̆ng bruă mdrao mgŭn, mjing jar hdră bhiăn găl ênưih, hưn mdah kơ dŭm anôk bruă ksiêm mkă, mdrao klei ruă. Klei anei bi mklă klei gĭr mơ̆ng jih Bruă kƀĭn ala leh anăn Knŭk kna hlăm hdră mkŏ mjing, bi leh leh anăn mtrŭn Hdră bhiăn. Hlăm wưng kơ anăp, Khua bruă kƀĭn ala Vương Đình Huệ mtă: Bruă mdrao mgŭn lŏ dơ̆ng ksiêm dlăng djăp ênŭm kơ bruă klam, klei yuôm bhăn mơ̆ng bruă mdrao mgŭn, klei mtă mơ̆ng Awa Hồ, ai tiê dŭm Hdră mtrŭn mơ̆ng Đảng kơ bruă mdrao mgŭn. Hdră mtrŭn mrô 20 bi mklă mkŏ mjing bruă mdrao mgŭn Việt Nam kreh knhâo, djuê ana leh anăn lar bra, hŏng hdră kñăm jing mđĭ klei suaih pral kơ asei mlei, ai tiê leh anăn hnơ̆ng hdĭp mda mnuih ƀuôn sang./.