VOV4.Êđê - Lŏ dơ̆ng gưl nao mă bruă ti dŭm čar Dhŭng kwar Krah, aguah 27/7, Khua bruă kƀĭn ala Vương Đình Huệ leh anăn Êpul mă bruă nao mă bruă hŏng Anôk dlăng bruă Đảng čar Quảng Nam. Khua bruă kƀĭn ala Vương Đình Huệ bi mni, mơ̆ng sa čar thơ̆ng hŏng bruă pưk hma, Quảng Nam gĭr ktưn jing sa čar mâo bruă duh mkra kah knar man dưn hlăm krĭng wăl, hnơ̆ng bruă duh mkra ƀrư̆ hruê ƀrư̆ pŏk mlar, jing 1 hlăm 16 čar, ƀuôn prŏng mâo klei kah mbha kơ ngăn prăk gưl dlông leh anăn jing čar sa anăn kluôm ala mâo wăl bruă duh mkra pŏk mlar, wăl duh mkra ktuê hang ksĭ leh anăn wăl duh mkra ƀăng jang knông lăn.

Hdră bruă đru kơ klei hdĭp mda ala ƀuôn dưi rơ̆ng, boh nik leh ênoh phung dưi dưn hdră êlan, phung mâo ai krŭ kdơ̆ng mâo truh 23% ênoh mnuih ƀuôn sang kluôm čar. Hlăm wưng kơ anăp, Khua bruă kƀĭn ala Vương Đình Huệ mtă kơ čar lŏ dơ̆ng ktuê dlăng dŭm hdră êlan ngă bruă pŏk ngă dŭm Hdră mtrŭn mơ̆ng gưl dlông, mơ̆ng čar; mkŏ mjing hdră ƀhĭ klĭ čiăng hlue ngă; mkŏ mjing gru hmô hlăm klei mđĭ kyar bruă hiu čhưn ênguê, kơrŭ wĭt hiu čhưn ênguê êdei klei ruă tưp, wăl hdĭp mda, mnơ̆ng dhơ̆ng hiu čhưn ênguê brei mâo klei êdah kdlưn, mđĭ ktang 3 hdră kñăm ala čar./.

H’ Zawut pô mblang