VOV4.Êđê- Tlam mbruê 1/4, ti sang bruă kƀĭn ala, Khua bruă kƀĭn ala Vương Đình Huệ gĭt gai leh klei mă bruă hŏng khua bruă Đảng čar Bến Tre. Klei mă bruă kñăm hmư̆ klah čŭn boh sĭt klei đĭ kyar bruă duh mkra ala ƀuôn čar Bến tre thŭn 2021, hmư̆ dŭm klei hưn mdah, klei kčĕ mơ̆ng čar kơ dŭm hdră êlan, kñăm đru kơ čar Bến Tre đĭ kyar hlăm wưng Khua knŭk kna mrâo bi klă hdră čuăl mkă đĭ kyar krĭng dap mnai krông Cửu Long.

Blŭ hlăm mmông mă bruă, Khua bruă kƀĭn ala Vương Đình Huệ tŭ ư hŏng dŭm klei hưn mdah mơ̆ng čar Bến Tre kơ bruă lông ngă hdră mkăp ksĭng êa sĭ ti đa đa alŭ wăl hang êa ksĭ mơ̆ng čar, Khua bruă kƀĭn ala Vương Đình Huệ mtă, čar čiăng bi mguôp kjăp hŏng phŭn bruă hdră êlan leh anăn duh bi liê čiăng dưi hluê ngă. Khua bruă kƀĭn ala Vương Đình Huệ sa ai hŏng klei kčĕ mơ̆ng čar kơ bruă hnưm duh bi liê êlan ktuê kban Rạch Miễu 2, mtă kơ čar bi mguôp hŏng dŭm phŭn bruă ksiêm dlăng ngăn prăk, đru kčĕ hŏng knŭk kna, bruă kƀĭn ala ksiêm dlăng, bi klă mkăp brei ngăn prăk kơ hdră mkăp.

Pô mblang: Y-Khem Niê