Blŭ hrăm hlăm klei bi kƀĭn, Khua bruă kƀĭn ala Vương Đình Huệ cihi yap, bi myuôm mặt trận čar kwar Việt Nam, dŭm êpul êya mâo nanao klei hyuă kjăp klei mĭn mơ̆ng klei kƀĭn Kluôm tal 13 mơ̆ng Đảng kơ bruă bi lar klei êngiê yang ƀuôn ngă phŭn, mkŏ mjing leh anăn bi lar ai ktang klei bi mguôp djuê ana, hluê ngă tŭ dưn hdră “Đảng gĭt gai, knŭk kna kriê dlăng, mặt trận čar kwar leh anăn dŭm êpul êya bruă kđi čar – yang ƀuôn jing kmeh gơ̆ng” leh anăn hdră êlan: mnuih ƀuôn sang thâo, mnuih ƀuôn sang bi trông, mnuih ƀuôn sang ngă, mnuih ƀuôn sang ksiêm dlăng, mnuih ƀuôn sang tŭ.

Hlăm wưng kơ anăp, Khua bruă kƀĭn ala Vương Đình Huệ mñă kơ dua anôk bruă lŏ dơ̆ng mđĭ hĭn klei bi mguôp hlăm bruă bi kjăp klei bi mguôp djuê ana. Anei jing knhuah gru yuôm bhăn, hdră êlan yuôm, klă sĭt mơ̆ng Đảng, ai ktang prŏng, mnơ̆ng bi klă klei tŭ jing hlăm bruă mkŏ mjing leh anăn răng mgang ala čar.