VOV4.Êđê - Aguah mbruê 9/2, Khua bruă kƀĭn ala Vương Đình Huệ nao myơr leh brui mngưi bi hdơr kơ phung aduôn aê tâo tiêt mâo ai đru kơ ala čar ti Sang Kkuh mpŭ kơ adiê, wăl knuah gru Hoàng thành Thăng Long, ƀuôn prŏng phŭn Hà Nội. Hlăm ai êwa yuôm bhăn ti Hoàng thành Thăng Long, Khua bruă kƀĭn ala Vương Đình Huệ mbĭt hŏng êpul bi ala myơr leh brui mngưi čiăng bi hdơr, mpŭ kơ phung aduôn aê tâo tiêt mâo ai đru hŏng ala čar hlăm dŭm boh tŭ dưn mkŏ mjing, mđĭ kyar ala čar, hmăng hmưi kơ mnuih ƀuôn sang êđăp ênang, bi lar knhuah gru êbâo thŭn, dŭm klei yuôm bhăn mơ̆ng djuê ana, bi râo klei bi mguôp, mtrŭt mđĭ klei mlih mrâo, bi mrâo mrang ala čar. Blŭ hrăm hŏng phung knuă druh, mnuih mă bruă ti wăl knhuah gru Hoàng thành Thăng Long, Khua bruă kƀĭn ala Vương Đình Huệ hmăng hmưi phung knuă druh, mnuih mă bruă ti nei gĭr ktưn kriê pioh dŭm klei yuôm bhăn mơ̆ng Hoàng thành Thăng Long, hur har ngă bruă hâo hưn kơ dŭm klei yuôm bhăn hƀuê ênuk, đru mkŏ mjing ƀuôn prŏng phŭn, djŏ guôn phung aduôn aê nao êlâo.

Y-Ƀel pô mblang