VOV4.Êđê - Aguah 8-2, Khua bruă kƀĭn ala Vương Đình Huệ nao čhưn, hơêč hmưi Tết ti Êpul grup tă kčoh Việt Nam (Vinatex). Khua bruă kƀĭn ala Vương Đình Huệ hơêč hmưi kơ klei tŭ dưn jăk, mơak mơ̆ng bruă tă kčoh mâo leh hlăm thŭn 2021. Hlăm wưng kơ anăp, Khua bruă kƀĭn ala Vương Đình Huệ mtă, brei Vinatex mă klei hriăm yuôm bhăn, pai mă klei găl, hdră ngă hlăm klei bi mlih hdră mkăp năng hnơ̆ng ala čar ăt msĕ mơh klei bi hgŭm bruă tă kčoh kluôm rŏng lăn, êngao kơ anôk ba čhĭ ti ala tač êngao, brei êpul grŭp lŏ mđing hĭn kơ anôk ba čhĭ hlăm ala čar hŏng giăm 100 êklăk čô mnuih ƀuôn sang.

Khua bruă kƀĭn ala Vương Đình Huệ čang hmăng, Vinatex lŏ dơ̆ng mkra mđĭ, mkŏ mjing klei bi hgŭm mă bruă jăk, hơĭt kjăp leh anăn đĭ kyar hlăm bruă duh mkra. Mđĭ ktang bruă mkŏ mjing Đảng doh, kjăp ktang, mđĭ lar bruă klam êpul kriê dlăng mnuih mă bruă hlăm bruă kƀĭn, bi hgŭm mkŏ mjing êpul mă bruă Việt Nam mrâo mrang, kjăp ktang, ba anăp hlăm hdră hluê ngă bruă kla đĭ kyar pral leh anăn kjăp.

H’Zawut pô mblang