VOV4.Êđê - Ƀri wưng hruê klei mrâo cách mạng Việt Nam 21/6, Khua bruă kƀĭn ala Vương Đình Huệ mâo leh klei nao čuă, mă bruă hŏng bruă klei mrâo phung bi ala yang ƀuôn. Blŭ hlăm mmông mă bruă, Khua bruă kƀĭn ala Vương Đình Huệ mñă klă, bruă klei mrâo čih hưn klă sĭt leh “êwa hlăm klei hdĭp” hlăm klei kƀĭn bruă kƀĭn ala leh anăn jing mbah mđung čiăng kơ phung bi ala, mnuih ƀuôn sang ktuê dlăng klei ngă bruă mơ̆ng bruă kƀĭn ala leh anăn dŭm anôk bruă knŭk kna. Khua bruă kƀĭn ala Vương Đình Huệ mñă klă, hlăm wưng klei mrâo mrang mrô, êpul khua kiă kriê bruă klei mrâo phung bi ala yang ƀuôn amâo mâo mdei klei mbruă, ktang phĭt mâo klei mlih mrâo hlăm mta phŭn, hdră hâo hưn, tui duah dŭm hdră êlan djŏ guôp hŏng dŭm hnơ̆ng čuăn mrâo hlăm bruă duh mkra mrô, yang ƀuôn mrô ala čar drei dôk mđĭng truh. Čiăng mđĭ hĭn boh tŭ dưn hlăm bruă klei mrâo, hâo hưn kơ klei ngă bruă mơ̆ng bruă kƀĭn ala, Khua bruă kƀĭn ala Vương Đình Huệ mtă kơ bruă klei mrâo phung bi ala yang ƀuôn ngă jăk bruă čuăl mkă đĭ kyar, kriê dlăng djŏ guôp, mkŏ mjing klei sa ai hlăm klei ngă bruă, rơ̆ng djŏ hdră tă, klei gĭt gai mơ̆ng Đảng, hdră êlan, klei bhiăn ala čar.

Y-Ƀel pô mblang