VOV4.Êđê-

Tlam mmăt hruê 24/1, ƀri mprăp drông Tết Nhâm Dần 2022, Khua bruă kƀĭn ala Vương Đình Huệ leh anăn Êpul mă bruă mơ̆ng Gưl dlông nao hlăm Hdră “Yan mnga knông lăn hơĭt ai tiê mnuih ƀuôn sang ktuê hang ksĭ” ti kđông kahan răng mgang knông lăn Rạch Gốc, kdriêk Ngọc Hiển, čar Cà Mau. Blŭ hrăm hlăm hdră, Khua bruă kƀĭn ala Vương Đình Huệ mơak ƀuh, wăt tơdah klei hdĭp mâo lu klei dleh dlan, knuă druh, lĭng kahan răng mgang knông lăn Cà Mau, hlăm anăn Kđông kahan răng mgang knông lăn Rạch Gốc, kjăp ai tiê anôk phŭn, bi hgŭm, pŏk ngă mđrăm mbĭt dŭm hdră msir gang mkhư̆ kjăp ktang păn kjăp boh klei dŭm mta bruă răng mgang knông lăn, răng mgang kjăp ktang klei dưi kriê dlăng plao ksĭ, krĭng êa ksĭ mơ̆ng čar. Khua bruă kƀĭn ala Vương Đình Huệ mñă klă, boh nik hlăm gưl Tết Nguyên đán Nhâm Dần anăp truh, knuă druh, lĭng kahan dŭm anôk bruă Kahan răng mgang knông lăn čar Cà Mau bi hgŭm leh tliêr kjăp hŏng gưl bruă Đảng, bruă sang čư̆ êa, kriê dlăng Tết kơ mnuih ƀuôn sang dŭm să ktuê hang ksĭ, mđing dlăng đru dŭm gŏ sang mâo ai hŏng cách mạnh, gŏ sang knŭk kna dlăng ba, gŏ êsei ƀun, hđeh nao sang hră ti alŭ wăl dưi drông yan mnga trei mđao, djăp ênŭm, jăk mơak.

 Hlăm hdră, Khua bruă kƀĭn ala Vương Đình Huệ leh anăn phung hlăm êpul mă bruă mơ̆ng Gưl dlông mđup brei leh 750 hnư prăk kơ Kđông răng mgang knông lăn Rạch Gốc, êpul phŭn gang mkhư̆ klei ruă tưp, gŏ sang knŭk kna dlăng ba, gŏ êsei ƀun, gŏ êsei dleh dlan ti kdriêk Ngọc Hiển.

Êlâo kơ anăn, Khua bruă kƀĭn ala Vương Đình Huệ mâo leh klei nao čuă, hơêč hmưi tết kơ phung knuă druh, lĭng kahan phao ktuang mơ̆ng Tiểu đoàn U Minh 2 leh anăn phung đoàn viên, phung mă bruă ti să Phong Điền, kdriêk Trần Văn Thời, čar Cà Mau. Tiểu đoàn U Minh 2 jing êpul kahan knhăk hlăm čar, jing anôk čŏng ngă bruă, kmeh gơ̆ng hlăm klei bi mblah mơ̆ng lĭng kahan leh anăn mnuih ƀuôn sang čar Cà Mau hlăm ênuk blah Mi, klei bi blah răng mgang knông lăn Yŭ dhŭng leh anăn ngă bruă klam đru kơ ala čar mah jiăng Campuchia. Blŭ ti anôk bruă Tiểu đoàn U Minh 2, Khua bruă kƀĭn ala Vương Đình Huệ hmăng hmưi, phung knuă druh, lĭng kahan ti nei srăng rơ̆ng kjăp kơ hưm bruă cách mạng, klei gru mngač, bi leh bruă klam mâo Đảng, knŭk kna leh anăn mnuih ƀuôn sang jao leh.

Pô mblang: H’Zawut Ƀuôn Yă - Y-Ƀel Êban