VOV4.Êđê - Ti sang bruă kƀĭn ala Hungary, hlăm klei nao čuă ala čar Hungary, bruă kƀĭn ala Việt Nam leh anăn bruă kƀĭn ala Hungary mkŏ mjing leh klei kƀĭn čuh mkra klei bhiăn gưl tal 4 hŏng akŏ “Bi kluôm hdră klei bhiăn kơ bruă bi hrŏ êwa čhŏ, yua pui kmlă doh leh anăn bruă duh mkra mtah”, Khua bruă kƀĭn ala Vương Đình Huệ leh anăn khua bruă kƀĭn ala Hungary László Kövér  hrăm mbĭt gĭt gai klei kƀĭn.

Hlăm klei kƀĭn, phung bi ala bruă kƀĭn ala, phung thơ̆ng kơ bruă 2 ala čar mâo leh klei bi trông kơ dŭm boh klei ba mdah, dŭm klei lông dlăng čiăng mgaih msir hlăm bruă Bi kluôm hdră klei bhiăn kơ bruă bi hrŏ êwa čhŏ, yua pui kmlă doh leh anăn hdră êlan kơ klei đĭ kyar kjăp, yan adiê leh anăn hdră bhiăn kơ bruă duh mkra mtah. Blŭ hlăm klei kƀĭn, Khua bruă kƀĭn ala Vương Đình Huệ mñă klă, Việt Nam srăng lŏ dơ̆ng ngă bruă hmar, ktang leh anăn kluôm, čŏng pô mlih yua pui kmlă mtah, pui kmlă doh leh anăn mđĭ kyar bruă mkŏ mkra djŏ guôp hŏng klei mlih yan adiê, dlăng anei jing klei găl čiăng mtrŭt mđĭ klei bi hmô mđĭ kyar mtah nanao, cacbon ƀiă leh anăn kjăp.

Y-Ƀel pô mblang