VOV4.Êđê- Tlam mbruê 6/5, ti Hà Nội, Phŭn bruă kahan ksiêm mkŏ mjing klei kƀĭn trông ksiêm wĭt 1 thŭn hluê ngă klei bi klă mrô 1 mơ̆ng phŭn bruă kđi čar, ksiêm wĭt klei mtrŭt mjhar “Mkŏ mjing knhuah kahan ksiêm yang ƀuôn jhŏng ktang, kreh knhâo, kyua mnuih ƀuôn sang”, hdră bhiăn mă klei blŭ mnuih ƀuôn sang leh anăn mđŭp brei dŭm hdră pah mni gưl ala čar. Khua bruă kƀĭn ala Vương Đình Huệ nao hlăm klei kƀĭn anei. Blŭ hlăm klei kƀĭn, bi ala kơ Đảng, knŭk kna, Dhar bruă gĭt gai bruă kƀĭn ala, Khua bruă kƀĭn ala Vương Đình Huệ pah mni leh anăn hơêč hmưi dŭm boh tŭ dưn, bruă tŭ jing mơ̆ng êpul êya kahan ksiêm yang ƀuôn dưi mâo leh.

Hlăm hruê mmông kơ anăp, Khua bruă kƀĭn ala Vương Đình Huệ mtă kơ bruă Đảng kahan ksiêm gưl dlông, Phŭn bruă kahan ksiêm lŏ dơ̆ng mtrŭt mđĭ bruă tui hriăm leh anăn hluê ngă klei mĭn, knhuah hdĭp Hồ Chí Minh hluê si klei bi klă mrô 1, asăp mtrŭn mrô 5 mơ̆ng phŭn bruă kđi čar nao mbĭt hŏng bruă hluê ngă 6 klei mtă mơ̆ng Awa Hồ mtô kơ kahan ksiêm yang ƀuôn, klei mtrŭt mjhar “Mkŏ mjing knhuah kahan ksiêm yang ƀuôn jhŏng ktang, kreh knhâo, kyua mnuih ƀuôn sang” čiăng kñăm kơ bruă mtô mjuăt bruă kđi čar, klei hâo hưn, knhuah hdĭp, ai tiê bruă klam, klei mĭn đru mguôp kơ ala čar, đru kơ mnuih ƀuôn sang hlăm kluôm êpul êya.

Pô mblang: Y-Ƀel Êban