VOV4.Êđê- Mmăt hruê 13/5, ti Wăl tač Sang kdŏ mmuiñ ƀuôn prŏng Hải Phòng, mkŏ mjing Knăm mơak mnga kting hrah - Hải Phòng 2022, bi hdơr 67 thŭn Hruê mtlaih êngiê Hải Phòng. Khua bruă kƀĭn ala Vương Đình Huệ nao hlăm klei bi kƀĭn. Blŭ hrăm hlăm klei bi kƀĭn, Khua Knơ̆ng bruă sang čư̆ êa ƀuôn prŏng Hải Phòng Nguyễn Văn Tùng brei thâo, hlăm hdră mkŏ mjing leh anăn răng kriê lăn čar, Hải Phòng mâo dŭm ênuk bi mklă jing “ƀăng jang Ƀuôn prŏng”, jing “anôk phŭn”, mbĭt anăn “jing anôk kjăp” čiăng răng mgang čar kwar.

Mâo Đảng leh anăn Knŭk kna mđing dlăng, anăn Hải Phòng đĭ kyar ktang leh anăn êdah kdlưn. Ênoh mrô bi ktưn mơ̆ng ƀuôn prŏng Hải Phòng dŭm thŭn giăm anei dưi mkra mđĭ, thŭn êdei dưi dăp lu hĭn thŭn êlâo. Knăm mơak Mnga Kting hrah - Hải Phòng 2022 jing klei yuôm bhăn čiăng hưn mdah pŏk rup, mđĭ lu jơr leh anăn hnơ̆ng jăk mnơ̆ng dhơ̆ng hiu chưn ênguê; đru mđĭ kyar bruă duh mkra ala ƀuôn ti ƀuôn prŏng./.

                                               Pô mblang: H’Zawut Ƀuôn Yă