VOV4.Êđê- Aguah anei, Êpul gơ̆ng bruă ƀuôn sang čar Phú Thọ pŏk kčưm leh klei kƀĭn tal 4, Êpul gơ̆ng bruă ƀuôn sang čar gưl 19, wưng thŭn 2021 - 2026. Nao hgŭm leh anăn blŭ gĭt gai klei kƀĭn, Khua bruă kƀĭn ala Vương Đình Huệ yap yuôm bhăn dŭm boh tŭ dưn čar Phú Thọ dưi mâo leh hlăm hruê mmông êgao leh anăn lač, hlăm klei tŭ jing mbĭt mơ̆ng čar, mâo klei đru mguôp yuôm bhăn mơ̆ng Êpul gơ̆ng bruă ƀuôn sang, phung bi ala Êpul gơ̆ng bruă ƀuôn sang dŭm gưl čar Phú Thọ.

Khua bruă kƀĭn ala mtă kơ bruă Đảng čar, bruă sang čư êa čar Phú Thọ lŏ dơ̆ng hluê ngă mâo boh tŭ dưn hdră mtrŭn mơ̆ng klei kƀĭn kluôm bruă Đảng tal 13, hdră mtrŭn klei kƀĭn bruă Đảng čar gưl 19 leh anăn dŭm hdră ngă bruă mâo leh klei bi klă hluê ngă dŭm hdră mtrŭn mơ̆ng gưl dlông, bruă kƀĭn ala, knŭk kna. Dŭm hdră êlan dưi ba mdah čiăng kñăm kơ dŭm hdră êlan bi lar klei găl, mâo knhuah mdê hĭn mơ̆ng sa čar krĭng kngư čư̆ čhiăng leh anăn mđing truh kơ bruă bi mguôp krĭng, mđĭ kyar dhar kreh leh anăn yang ƀuôn hluê êlan răng mgang wăl hdĭp mda.

Pô mblang: Y-Ƀel Êban