Hlăm mmông bi tuôm, Khua bruă kƀĭn ala Vương Đình Huệ hưn hŏng Khua kiă kriê dhar bruă hŏng tač êngao mơ̆ng Bruă kƀĭn ala Bangladesh kơ bruă mkŏ mjing êpul bi hgŭm khua êmua bi hgŭm Việt Nam – Bangladesh, mñă kơ dhar bruă hŏng tač êngao mơ̆ng bruă kƀĭn ala Việt Nam leh anăn Bangladesh jing kdrông mkŏ yuôm bhăn mtrŭt mđĭ klei bi mguôp hlăm djăp mta bruă mơ̆ng 2 lăn čar, boh nik hlăm bruă hluê ngă dŭm klei kuôl kă leh anăn hră bi mguôp leh bi klă.

Khua bruă kƀĭn ala hmăng hmưi hlăm wưng kơ anăp săng mâo lu êpul khua êmua mơ̆ng dŭm Dhar bruă mơ̆ng bruă kƀĭn ala Bangladesh, phung khua êmua mniê, phung khua êmua mda asei hriê ti Việt Nam čiăng mđĭ klei mjĕ êrô, kah mbha klei thâo, mbĭt anăn mkŏ mjing boh kdrŭt kơ klei mjĕ giăm 2 ala čar.