https://vov4.vov.vn/ede/klei-mrao-yang-uon-thoi-su-xa-hoi/klei-cih-brua-bi-khuat-epul-ma-brua-sa-klei-long-dlang-dleh-dlan-ko-phung-knua-druh-klei-cih-tal-1-phung-kap-dru-nah-tluon-gir-ktun-nao-pha-anap-486759.vov4

Anăn jing phung knuă druh đuĕ mơ̆ng Dak Lak nao ti wăl krah Gia Nghĩa, kdriêk Dak Nông 20 thŭn êlâo. Ai tiê bi hgŭm leh anăn klei gĭr diñu đru mguôp mkŏ mjing wăl 6 kdriêk nah Dhŭng Dak Lak hđăp, jing čar Dak Nông mâo hnơ̆ng đĭ kyar, hnơ̆ng bi hrŏ gŏ êsei ƀun pral hĭn Lăn Dap Kngư; mkŏ mjing wăl krah ka đĭ kyar jing wăl krah mnga kñĭ Gia Nghĩa bŏ hŏng klei čang hmăng. Anăn jing klei hƀuê ênuk jăk siam, mjing boh kdrŭt mđĭ ai tiê phung knuăd ruh, klei thâo phung đảng viên lŏ dơ̆ng dưi mđĭ lar hlăm klei bi khuăt êpul mă bruă knŭk kna dôk mkŏ mjing mjêč.

Êbeh 20 thŭn êlâo, hruê 1/1/2004, čar Dak Nông klă klơ̆ng bi klah mơ̆ng čar Dak Lak hluê si hdră mtrŭn mơ̆ng Bruă Kƀĭn Ala. Mta kñăm hlăk anăn jing mtrŭt mđĭ klei đĭ kyar Lăn Dap Kngư, mđĭ hĭn bruă kriê dlăng bruă knŭk kna, rơ̆ng kơ bruă lĭng kahan, răng mgang klei êđăp ênang. Ƀiădah ti krĭng lăn “ruê knĭ ktâo asâo amâo mâo hmao angĭn Dak Song”, ƀun hlăm bruă mkŏ mka, kƀha hlăm klei găl yang ƀuôn, dŭm boh ƀrĭk tal êlâo mơ̆ng bruă sang čư̆ êa dưm mdưm hŏng sa ênuk knuă druh mda asei. Mnơ̆ng ba mbĭt mơ̆ng diñu jing kdô gui leh anăn klei jih ai tiê. Amâo mâo anôk mă bruă, diñu mưn sang. Amâo mâo pui kmlă êa jia, diñu čŏng duah mĭn. Amâo mâo djăp êpul êya, diñu mă êjai hriăm êjai. Hlăm dŭm klei yăl dliê mơ̆ng knuă druh ênuk anăn, jing sa wưng dleh dlan kƀah êwư, ƀiădah amâo mâo kƀah ôh klei đăo knang:

  “Grăp aguah knăm sa 4h30 pô nao. Hriê tinei sa hruê kăm wĭt hŏng mô̆ anak sa blư̆. Hriê tinei dôk ti sang dôk mbĭt, mmăt huă ti sang dôk mbĭt. Leh anăn…ayŏng adei ăt bi mđĭ ai ngă bi leh bruă klam”.

Hlăm dŭm thŭn mlan dleh dlan, hruê anei Dak Nông mâo leh lu klei bi mlih. Ƀuôn prŏng Gia Nghĩa ară anei kdrưh kơăm, bruă mkŏ mkra hrăm mbĭt, dŭm mta bruă msĕ si sang hră mơar, bruă mdrao mgŭn, dhar kreh, hiu čhưn ênguê mâo klei đĭ kyar ktang. Klei anei mâo Ngô Thanh Danh, khua bruă Đảng čar Dak Nông mñă klă:

“Leh 20 thŭn lŏ mkŏ mjing čar, Dak Nông dưi tlaih mơ̆ng sa čar ƀun ka đĭ kyar. Klei đĭ kyar bruă duh mkra dôk nanao ti hnơ̆ng lu, hnơ̆ng mnơ̆ng dhơ̆ng êbeh 12 blư̆, kluôm ênoh duh bi liê mđĭ kyar yang ƀuôn 20 blư̆, hnư hrui wĭt kah knar grăp čô đĭ 13 blư̆ mkă hŏng thŭn 2004”.

Anăn amâo djŏ knŏng jing ênoh mrô! Anăn jing boh tŭ dưn mơ̆ng sa gưl knuă druh klam dlông mra jih sa wưng mkŏ mjing, mơ̆ng amâo mâo truh kơ mâo. Ară anei hdră êlan bi mŭt Dak Nông hlăm Lâm Đồng dưi hluê ngă, êpul knuă druh Dak Nông lŏ mŭt hlăm hdră mrâo, mâo lu klei hmăng hmưi wăt kơ klei rŭng răng, kyua anăn amâo djŏ knŏng klei bi mlih mơ̆ng klei mă bruă ƀiădah lŏ jing klei mlih wăt klei hdĭp. Amai Lê Thị Huệ, knuă druh Êpul mkŏ mjing bruă Đảng čar brei thâo:

“Hmei bi lač hlăp ară anei jing 1 čô 5 ƀuôn sang. Hmei đăo knang hlăm hdră êlan mơ̆ng Đảng, hmăng hmưi mâo lu klei bi mlih, jăk hlăm anôk mă bruă mrâo, Hmei srăng lŏ gĭr duh myơr yơh”.

Amai Nguyễn Thị Quy, Khua adŭ bruă klei mrâo, Sang mđung asăp leh anăn mđung rup čar Dak Nông brei thâo:

  “Mmông anăn pô hŏng ai tiê mda asei, amâo mâo kpăk hŏng gŏ sang. Tal anei ăt mâo klei mprăp ƀiădah pô srăng mprăp hjăn. Msĕ si gŏ sang, pô mâo anak điêt ti anôk brei ñu hriăm, ya dŏ mă…djăp bruă pô srăng ksiêm duah, tĭng mkă klă”.

20 thŭn êlâo, phung knuă druh mơ̆ng čar Dak Lak đuê̆ mơ̆ng ƀuôn prŏng Ƀuôn Ama Thuôt nao ti Gia Nghĩa hŏng ai tiê nao êlâo mơ̆ng phung mda asei, bi tal anei, diñu mơ̆ng Gia Nghĩa nao ti Đà Lạt hŏng kơhưm jing pô tuôm găn. Nguyễn Thị Thu Hường, k’iăng khua êpul mkŏ mjing bruă Đảng čar Dak Nông mñă klă, wăt kơ klei rŭng răng ƀiădah knuă druh Dak Nông ăt dôk nanao klei mĭn găn jih klei dleh dlan leh anăn ai tiê duh myơr:

“Êbeh 20 thŭn đru mguôp leh anăn mkŏ mjing čar Dak Nông, hmei hur har nao phă anăp leh anăn dưi bi klă pô. Leh anăn tal anei lŏ bi mŭt čar, hmei srăng lŏ dơ̆ng bi lar ai tiê bruă klam mơ̆ng knuă druh đảng viên. Mbĭt anăn mđĭ ai phung knuă druh, đảng viên lŏ dơ̆ng mđĭ ai tiê leh anăn mprăp nao mă bruă”.

Bruă bi mŭt mbĭt Dak Nông - Lâm Đồng - Bình Thuận amâo djŏ knŏng mkŏ dăp anôk bruă knŭk kna. Hŏng hdră tă wưng sui, anei jing klei găl čiăng mđĭ kyar krĭng bruă duh mkra Dhŭng Lăn Dap Kngư, anôk krĭng dhar kreh Dak Nông - Lâm Đồng - Bình Thuận dưi bi kƀĭn, bi kna leh anăn lar bra. Lê Thành Hiệp, Khua anôk bruă dhar kreh film rup Dak Nông đăo knang:

 “Leh 3 čar dưi bi mŭt mbĭt jing sa čar Lâm Đồng, jing dưi mđĭ kyar krĭng bruă duh mkra mrâo, hlăm anăn boh nik jing dhar kreh, djuê ana mơ̆ng 3 krĭng kwar srăng mâo klei mjĕ mjuk ksiêm hriăm čiăng thâo klă hĭn kơ knhuah gru dhar kreh mơ̆ng 3 krĭng čiăng mđĭ kyar dhar kreh, hiu čhưn ênguê čiăng mđĭ kyar mbĭt kơ čar Lâm Đồng mrâo”.

Dua pluh thŭn êlâo, phung knuă druh ti Dak Lak kbưi hŏng gŏ sang, mkŏ mjing čar mrâo Dak Nông. Dua pluh thŭn êdei, diñu lŏ đuê̆ mơ̆ng Dak Nông hŏng klei hriăm leh anăn klei gĭr. Phung knuă druh Dak Nông hruê anei lŏ dơ̆ng jing hla čhiăm gru nao êlâo, djă pioh kjăp klei đăo knang hlăm dŭm bruă cách mạng mâo Đảng, knŭk kna leh anăn mnuih ƀuôn sang dôk ngă, đăo knang hlăm êdei anăp mâo ai tiê găn klei dleh dlan leh anăn mkŏ mjing./.