VOV4.Êđê - Tlam mmăt mbruê, ti sang bruă kƀĭn ala, Khua bruă kƀĭn ala Vương Đình Huệ tŭ drông leh khua gĭt gai êpul grŭp Erax Honna Hitoshi. Khua bruă kƀĭn ala Vương Đình Huệ mñă klă, klei jĕ giăm jing ƀĭng hgŭm bi mguôp kyua klei êđăp ênang leh anăn mdrŏng sah Asi plah wah Việt Nam leh anăn Japon hlăm hruê mmông êgao đĭ kyar jăk siam hĭn, klă klơ̆ng leh anăn mâo boh tŭ hlăm djăp mta bruă. Hluê si Khua bruă kƀĭn ala Vương Đình Huệ, hdră êlan đĭ kyar pui kmlă leh anăn mkra mlih dŭm hdră êlan pui kmlă êran hŏng hdăng ară anei jiing dŭm sang măi mkra mjing pui kmlă mơ̆ng êpul grŭp Erex jing djŏ guôp hŏng hdră êlan ala čar kơ klei đĭ kyar mtah wưng thŭn 2021 -2030, hdră tă truh thŭn 2050 mơ̆ng Việt Nam mâo leh knŭk kna bi klă. Khua bruă kƀĭn ala Vương Đình Huệ mñă klă, bruă kƀĭn ala, knŭk kna Việt Nam sa ai hŏng êlan nao anei. Mbĭt anăn hâo hưn, ară anei, klei bhiăn ala čar Việt Nam mâo leh dŭm hdră bhiăn klă klơ̆ng kơ djăp mta bruă kñăm mkŏ mjing klei găl kơ jih jang knơ̆ng bruă ala tač êngao duhu bi liê kơ ala čar Việt Nam. Mrâo anei, êpul grŭp Erax ksiêm dlăng leh hlăm 16 čar, ƀuôn prŏng. Hluê si klei ksiêm dlăng, êpul grŭp dưi mkŏ mjing 19 hdră mkăp hŏng 1400 MW truh thŭn 2035, mbĭt hŏng anăn pŏk phai hĭn hliê si bruă mđĭ kyar mjeh ana kyâo mrâo, sang măi mâo hnơ̆ng mkra mjing pui kmlă prŏng.

Y-Ƀel pô mblang