VOV4.Êđê- Tlam mmăt mbruê 24/8, ti sang bruă kƀĭn ala, Khua bruă kƀĭn ala Vương Đình Huệ tŭ drông leh khua kiă kriê Êpul khua êmua bi hgŭm Dhŭng Korea – Việt Nam Kim Tae Nyeon ƀri wưng hruê čuă leh anăn mă bruă ti Việt Nam. Hlăm mmông tŭ drông, Khua bruă kƀĭn ala Vương Đình Huệ mñă klă, Việt Nam dlăng yuôm bhăn klei mjĕ giăm hŏng Dhŭng Korea leh anăn bi klă Dhŭng Korea jing ƀĭng hgŭm bi mguôp hdră êlan yuôm bhăn mrô 1, hŏng klei đăo knang wăt ti krĭng Ngŏ dưr Asi leh anăn tar rŏng lăn.

Knŭk kna Việt Nam mkŏ mjing nanao klei găl kơ phung duh bi liê, wăt kơ phung duh bi liê ngăn prăk ngă bruă ti Việt Nam. Bi kơ klei mjĕ giăm 2 anôk bruă klei bhiăn, Khua bruă kƀĭn ala Vương Đình Huệ yap yuôm bhăn bruă klam mơ̆ng khua gĭt gai Êpul Khua êmua bi hgŭm Dhŭng Korea – Việt Nam mbĭt hŏng phung khua êmua jing kdrông mkŏ, mtrŭt mđĭ klei bi mguôp plah wah bruă kƀĭn ala leh anăn mnuih ƀuôn sang 2 ala čar. Mâo klei đăo knang, hlăm wưng păn bruă anei, Êpul khua êmua bi hgŭm srăng lŏ mđĭ hĭn dŭm mta bruă mjĕ êrô tŭ jing, klă klơ̆ng, đru mtrŭt mđĭ klei bi hgŭm leh anăn bi mguôp, mjĕ êrô mnuih ƀuôn sang 2 ala čar.

Pô mblang: Y-Ƀel Êban