VOV4.Êđê - Lŏ dơ̆ng hdră mă bruă ti dŭm čar Lăn Dap Kngư, hruê 21/1, Khua dlăng bruă Đảng gưl dlông, Khua Dhar bruă čung ba mnuih ƀuôn sang Gưl dlông Bùi Thị Minh Hoài hŏng êpul mă bruă nao leh hlăm hdră “Yan mnga knông lăn” leh anăn nao čhưn, mđup brei mnơ̆ng kơ phung amĭ Việt Nam jhŏng ktang, gŏ sang knŭk kna dlăng ba, phung ƀun, gŏ sang dleh dlan, phung mă bruă, mnuih mă bruă ti čar Dak Lak ƀrư̆ gưl Tết Nguyên Đán Nhâm Dần 2022.

Êpul nao leh hlăm hdră “ Yan mnga knông lăn thŭn 2022” kyua Êpul êdam êra gưl dlông mkŏ mjing ti kdriêk Knông lăn Ƀuôn Đon leh anăn mđup brei êbeh 200 hnư mnơ̆ng, 500 êklăk prăk, 20 boh êdeh wai jơ̆ng, 20 hnư prăk hriăm hră kơ phung hđeh ƀun hgao klei dleh dlan leh anăn kơ gŏ sang knŭk kna dlăng ba, mnuih djuê ƀiă mâo klei hdĭp dleh dlan ti kdriêk Ƀuôn Đon.

Ăt hlăm hruê, êpul mă bruă êmuh hrăm, mđĭ ai leh anăn mđup brei mnơ̆ng Tết kơ phung mă bruă mâo klei hdĭp dleh dlan kyua Covid-19 ti čar.

H’Zawut pô mblang