VOV4.Êđê- Aguah 18/4, Êpul mă bruă mơ̆ng Dhar bruă hâo hưn mtô mblang gưl dlông mă bruă hŏng Dhar bruă Đảng čar Bình Định kơ bruă duh mkra - ala ƀuôn leh anăn bruă mkŏ mjing Đảng, kơ kđi čar, klei mĭn, knhuah hdĭp leh anăn boh klei bruă hâo hưn mtô mblang thŭn 2021 leh anăn Gưl I thŭn 2022. Khua dlăng bruă Đảng, Khua Dhar bruă hâo hưn mtô mblang gưl dlông Nguyễn Trọng Nghĩa gĭt gai mmông mă bruă.

Nguyễn Trọng Nghiã bi mni kơ klei tŭ bruă Đảng čar Bình Định mâo leh hlăm wưng êgao, anei jing tur knơ̆ng, boh kdrŭt čiăng lŏ dơ̆ng mđĭ ktang, ba Bình Định đĭ kyar ktang hĭn hlăm wưng kơ anăp. Nguyễn Trọng Nghĩa mtă, čiăng ba yua tŭ dưn klei găl, klei mkâo čar Bình Định, akâo kơ bruă Đảng čar, Êpul gơ̆ng bruă ƀuôn sang, Knơ̆ng bruă sang čư̆ êa leh anăn dŭm bruă djŏ tuôm, dŭm anôk bruă ti čar pral, păn kjăp Hdră mtrŭn Klei bi kƀĭn XIII mơ̆ng Đảng, dŭm hră mơar gĭt gai mơ̆ng gưl dlông mguôp hŏng hdră mtrŭn klei bi kƀĭn bruă Đảng dŭm gưl čiăng hluê ngă.

Pô mblang: H’Zawut Ƀuôn Yă