VOV4.Êđê - Anăp truh kơ hrue bi hdơr Hrue phung nai aê mdrao Việt Nam (27/2), aguah mbrue 21/2 Nguyễn Trọng Nghiã Khua Dhar bruă kiă kriê klei hâo hưn Gưl dlông nao čuă, hơêč hmưi kơ phung nai aê mdrao sang êa drao kahan gưl dlông mrô 108, Sang êa drao ksŏ Gưl dlông, lehanăn nao čuă, nai prŏng, nai prĭn Vũ Đức Đính pô mkŏ mjing Anôk mdrao mgŭn mjêč Việt Nam. Čih pioh jih jang klei duh myơr mơ̆ng phung nai aê mdrao hlăm dua boh sang êa drao lehanăn jih jang bruă mdrao mgŭn hlăm kluôm ala hlăk gĭr dôk ngă jih ai tiê hlăm bruă mdrao mgŭn mdrơ̆ng hŏng klei ruă tưp, ñu mñă, anei jing bruă duh myơr prŏng êdi kơ djuê ana. Lu phung nai, aê mdrao săn asei mlei hlăm anôk mdrơ̆ng hŏng klei ruă tưp. Mơĭt asăp hơêč hmưi truh kơ jih jang phung nai aê mdrao ƀri hrue phung nai aê mdrao Việt Nam, Nguyễn Trọng Nghiã mtă kơ kluôm bruă mdrao mgŭn hlue ngă jăk hdră mtrŭn gưl dlông 6, gưl 12 kơ bruă lŏ dơ̆ng mlih mrâo klei mkŏ mjing, bruă kiă kriê, mđĭ hnơ̆ng kjăp, lehanăn tŭ jing bruă knuă mơ̆ng jih jang sang êa drao knŭk kna./.

Y-Khem pô mblang