VOV4.Êđê - Kñăm mprăp kơ klei bi kƀĭn tal 3, Bruă kƀĭn ala gưl XV, tlam 28/4, Phan Đình Trạc - Khua hlăm Phŭn bruă kđi čar, Khua dlăng bruă Đảng gưl dlông, Khua Anôk dlăng bruă Gưl dlông hŏng phung bi ala bruă kƀĭn ala čar Lâm Đồng mâo leh mmông bi tuôm hŏng phung bi ala kơ mnuih ƀuôn sang ti să Xuân Thọ, ƀuôn prŏng Đà Lạt. Ti mmông bi tuôm, bi ala Êpul bi ala bruă kƀĭn ala čar Lâm Đồng hâo hưn kơ dŭm mta phŭn hlăm klei bi kƀĭn kơ anăp, mbĭt anăn hưn klei tŭ bruă duh mkra- ala ƀuôn gưl 1/2022. 

Hluê anăn, wăt tơdah hmaĭ mơ̆ng Covid-19 ƀiădah kyua pŏk ngă hrăm mbĭt lu hdră msir hlăm boh klei mrâo, Bruă duh mkra- ala ƀuôn mơ̆ng lăn čar pral kơrŭ wĭt. Hlăm anăn, hnơ̆ng đĭ kyar GDP mâo lu, đĭ 5.03%, hdră bruă đĭ 4,58%, lu hĭn 1,5 blư̆ mkă hŏng wưng anei dŭm thŭn 2020-2021. Hjăn čar Lâm Đồng, prăk hrui wĭt knŭk kna hlăm mlan 4 akŏ thŭn mâo êbeh 4.700 êklai prăk, đĭ 4,76% mkă hŏng wưng anei thŭn dih; phung tuê hiu čhưn mâo êbeh 2 êklăk 3 êtuh êbâo gưl, đĭ 33% mkă hŏng wưng anei thŭn dih. Phung bi ala lŏ dơ̆ng lač kơ dŭm klei êdu kƀah čiăng dŭm gưl, dŭm dhar bruă mđing dlăng ƀư̆ mkra, anăn jing: bruă mkăp hră bi mklă yua lăn adôk êmưt, bruă čuăl mkă ba yua lăn ka klă mngač, prăk duh bi liê mkra mjing dleh dưi čan…

H’Zawut pô mblang