VOV4.Êđê - Tlam mbruê 14/4 khua êpul bruă hâo hưn gưl dlông mâo leh mmông mă bruă hŏng êpul khua bruă Đảng čar Quảng Ngãi. Hluê si klei hưn mdah, wưng tlâo mlan tal 1 thŭn anei, kluôm ênoh prăk hrui wĭt ala čar ti alŭ wăl čar Quảng Ngãi mâo êbeh 8.600 êklai prăk, đĭ 56,5% mkă hŏng wưng anei thŭn dih.

Bruă tuh tia ăt dưi rơ̆ng hnơ̆ng klei đĭ kyar, hnơ̆ng mkra mjing bruă tuh tia hlăm wưng tlâo mlan tal 1 ti 6,8% mkă hŏng wưng anei thŭn dih. Klei mnia mblei mâo 533 êklăk USD, đĭ 27,2% mkă hŏng wưng anei thŭn dih. Thượng tướng Nguyễn Trọng Nghĩa, khua hlăm bruă Đảng gưl dlông, khua êpul hâo hưn gưl dlông yap yuôm bhăn dŭm boh tŭ mơ̆ng bruă Đảng čar, bruă sang čư êa leh anăn mnuih ƀuôn sang čar Quảng Nam dưi mâo hlăm hruê mmông êgao, mbĭt anăn mtă kơ čar Quảng Nam gĭr ktưn hĭn čiăng lŏ mâo lu boh tŭ msĕ hŏng hdră mtrŭn klei kƀĭn phung bi ala bruă Đảng čar gưl tal 20 ba mdah leh. Wưng anei, Khua êpul bruă hâo hưn gưl dlông nao myơr brui mngưi, kwang mnga ti sang bi hdơr kơ pô jhŏng ktang djuê ana Trương Định, wăl knhuah gru mnơ̆ng bi klă Sơn Mỹ, msat pô khăp kơ ala čar Huỳnh Thúc Kháng.

Y-Ƀel pô mblang