VOV4.Êđê - lam mbruê 19/1, ti ƀuôn prŏng Hồ Chí Minh, Nguyễn Trọng Nghĩa, khua kiă kriê bruă hâo hưn gưl dlông nao čuă leh dŭm anôk bruă, phung kreh knhâo, gŏ sang mâo klei hdĭp dleh dlan ti alŭ wăl ƀuôn prŏng ƀri wưng Tết Nguyên đán Nhâm Dần 2022. Nao čuă adŭ bruă klei êđăp ênang êlan internet leh anăn gang mkhư̆ phung ngă soh hŏng kdrăp mrâo mrang kahan ksiêm ƀuôn prŏng Hồ Chí Minh, khua êpul bruă hâo hưn gưl dlông Nguyễn Trọng Nghĩa hmăng hmưi kahan ksiêm ƀuôn prŏng Hồ Chí Minh lŏ bi lar hĭn dŭm boh tŭ dưi mâo leh, rơ̆ng kjăp klei êđăp ênang bruă kđi čar, klei êđăp ênang yang ƀuôn, leh anăn jing êpul êya ba anăp bruă gang mkhư̆ klei ruă tưp, êpul thơ̆ng kơ bruă, êpul kmeh gơ̆ng rơ̆ng klei êđăp ênang hlăm alŭ wăl.

Mbĭt anăn, Nguyễn Trọng Nghĩa lŏ brei thâo, hdră êlan mơ̆ng Đảng, knŭk kna kơ bruă krŭ wĭt leh anăn mđĭ kyar bruă duh mkra – ala ƀuôn kñăm kơ 5 boh klei prŏng. Hlăm anăn mâo bruă gang mkhư̆ klei ruă tưp Covid-19, ngă jăk bruă bi hơĭt klei hdĭp, mkŏ mjing wăl mnia mblei jăk găl kơ êpul êya dŭm knơ̆ng bruă krŭ wĭt klei mnia mblei.

Y-Ƀel pô mblang