VOV4.Êđê - Tlam mbruê 26/1, aduôn Trương Thị Mai, khua êpul mkŏ mjing gưl dlông mbĭt hŏng êpul ngă bruă mâo leh klei nao čuă, hơêč hmưi tết kơ phung knuă druh, lĭng kahan leh anăn mnuih ƀuôn sang dŭm djuê ana ti alŭ wăl kdriêk Nậm Pồ, čar Điện Biên. Êpul ngă bruă mđup brei leh êbeh 140 hnư mnơ̆ng tết kơ dŭm gŏ sang mâo lĭng kahan êngiă asei, hđeh sang hră mâo klei hdĭp dleh dlan, gŏ sang knŭk kna dlăng ba, gŏ sang ƀun ƀin, phung mâo klei đăo knang hlăm yang ƀuôn, phung knuă druh, phung mă bruă knŭk kna, mnuih mă bruă mâo klei hdĭp dleh dlan hlăm alŭ wăl kdriêk Nậm Pồ. Mđup brei hnư mnơ̆ng kơ bruă Đảng nah gŭ, bruă sang čư êa să Si Pa Phìn leh anăn bruă Đảng kdriêk Nậm Pồ. Nao čuă, hơêč hmưi tết kơ phung knuă druh, lĭng kahanti kđông kahan knông lăn Sai Pha Phìn leh anăn êpul bruă duh mkra lĭng kahan 379, wăl kahan II, khua êpul mkŏ mjing gưl dlông Trương Thị Mai lŏ sa blư̆ mñă ktang bruă kma jing kmeh gơ̆ng mơ̆ng êpul lĭng kahan hlăm alŭ wăl hlăm bruă rơ̆ng klei êđăp ênang êlan knông lăn ala čar, ngă jăk bruă gang mkhư̆ klei ruă tưp Covid-19, gang mkhư̆ klei mŭt kbiă soh hŏng hdră bhiăn leh anăn phung ngă soh čiăng kơ mnuih ƀuôn sang drông tết êđăp ênang leh anăn mâo boh tŭ dưn.

Y-Ƀel pô mblang