VOV4.Êđê- Ƀri bi hdơr 132 thŭn Hruê kkiêng Khua gĭt gai Hồ Chí Minh (19/5/1890- 19/5/2022)  leh anăn 111 thŭn hruê Awa Hồ duah êlan mtlaih ala čar (5/6/1911-5/6/2022), aguah 18/5, khua gĭt gai ƀuôn prŏng Hồ Chí Minh mâo Nguyễn Văn Nên,  Khua hlăm phŭn bruă kđi čar, Khua dlăng bruă Đảng ƀuôn prŏng Hồ Chí Minh ngă khua êpul nao myơr ƀrui mngưi, mnga bi hdơr kơ Khua gĭt gai Hồ Chí Minh.

 Ti Sang kriê pioh kdrăp mnơ̆ng Hồ Chí Minh – ti ƀuôn prŏng Hồ Chí Minh, êpul myơr leh mnga, ƀrui mngưi bi hdơr kơ Khua gĭt gai Hồ Chí Minh. Phung bi ala pioh leh mnĭt mmông bi hdơr kơ ai tiê prŏng prĭn mơ̆ng Khua gĭt gai Hồ Chí Minh, Khua mơ̆ng Đảng leh anăn phung ƀuôn sang drei, Nai prŏng prĭn mơ̆ng bruă krŭ kdơ̆ng Việt Nam, Pô jhŏng ktang mtlaih êngiê djuê ana, Pô dhar kreh dlông rŏng lăn, Lĭng kahan cộng sản quốc tế bi hmô kơ klei duh myơr leh jih klei hdĭp kơ bruă krŭ kdơ̆ng mơ̆ng Đảng, mơ̆ng djuê ana ./.

Pô mblang: H’Zawut Ƀuôn Yă