VOV4.Êđê - Tlam mbrue (15/4), ti anôk bruă Đảng Gưl dlông, Khua gĭt gai Đảng Nguyễn Phú Trọng mâo leh klei bi blŭ hrăm hlăm đĭng blŭ hŏng khua knŭk kna India Narendra Modi. Hlăm klei bi blŭ hrăm anăn, Khua knŭk kna India lač, Việt Nam jing sa kmeh gơ̆ng yuôm bhăn kơ klei bi mguôp hŏng India, boh hlăm hdră êlan đuĕ nao phă Ngŏ, bi êdah ai tiê klei khăp hŏng lăn čar lehanăn phung ƀuôn sang Việt Nam.

Khua gĭt gai Đảng Nguyễn Phú Trọng mñă klei bi mguôp mâo leh mơ̆ng đưm plah wah Việt Nam lehanăn India mâo leh dŭm gưl phung khua kiă kriê, lehanăn phung ƀuôn sang dua ala čar ksul mbŭ mjut mjing lehanăn mđĭ kyar, mâo klei bi mguôp tliê kjăp kơ hƀuê ênuk lehanăn dhar kreh, jih jang klei tŭ dưn mbĭt hlăm lu bruă yuôm bhăn hŏng ala tač êngao mjing knơ̆ng klei bi hgŭm, lehanăn bi thâo săng hdơ̆ng găp. Kơ boh klei ti êa ksĭ Ngŏ, dua nah mâo leh klei bi tŭ ư kơ hdră êlan êđăp ênang, hơĭt kjăp, hrăm mbĭt mđĭ kyar lehanăn bi mpŭ kơ klei bhiăn tar rŏng lăn, hlăm anăn mâo klei bhiăn êa ksĭ thŭn 1982 mơ̆ng Êpul hgŭm lu ala čar kơ êa ksĭ, mpŭ kơ klei dưi êngiê mơ̆ng mdê bi ala čar, lehanăn klei dưi êngiê êlan êdeh phiơr lehanăn êlan êa ksĭ./.

Y-Khem pô mblang