VOV4.Êđê- Tlam mbrue (10/8), ti anôk bruă Đảng gưl dlông, Khua gĭt gai Đảng Nguyễn Phú Trọng drông čhưn leh hŏng Anuphap Tunalom, Khua bruă Đảng ƀuôn prŏng phŭn Vientian ala car Lao hlăk mâo gưl hriê čhưn lehanăn mă bruă ti Việt Nam. Ti anôk drông, Khua gĭt gai Đảng lač Việt Nam mpŭ nanao kơ klei bi mguôp hŏng Lao jing mrô sa, mđĭ kyar kluôm ênŭm hlăm klei bi mlih ti Lao.

Khua gĭt gai Đảng Nguyễn Phú Trọng brei thâo klei bi mguôp Việt Nam – Lao knư̆ hrue knư̆ mâo klei đĭ kyar, mtrŭn agha êlam hĭn, klă hĭn lehanăn tŭ jing leh hlăm djăp mta bruă, đru bi hơĭt bruă kđi čar, bruă lĭng kahan, lehanăn mđĭ kyar klei hdĭp mda ala ƀuôn mơ̆ng grăp ala čar, lehanăn tă êlan kơ klei bi hgŭm dŭm dhar bruă, dŭm gưl dua Đảng, dua ala čar hlăm wưng kơ anăp. Khua gĭt gai Đảng, čang hmăng ƀuôn prŏng phŭn Vientian lŏ dơ̆ng mâo klei bi mguôp kjăp hgŭm hĭn hŏng ƀuôn prŏng Hà Nội, lehanăn dŭm čar, ƀuôn prŏng mơ̆ng Việt Nam, mâo klei bi đru, bi hâo hưn hlăm djăp mta klei./.

Pô mblang: Y-Khem Niê