VOV4.Êđê - Tlam mbrue (28/4), ti anôk bruă Đảng gưl dlôn, Khua gĭt gai Đảng Nguyễn Phú Trọng drông leh êpul khua prŏng Lao mâo Pany Yathotou k’iăng khua lăn čar Lao djă akŏ klă klơ̆ng hriê čhưn kơ ala čar Việt Nam. Khua gĭt gai Đảng bi myuôm klei hriê čhưn anei lŏ mtrŭn agha êlam hĭn klei bi mguôp Việt Nam – Lao, mñă bruă amâo mâo mdei lŏ hyuă bi kjăp klei bi mguôp dua nah hŏng klei hơĭt kjăp lehanăn mđĭ kyar ti grăp ala čar, lehanăn kơ klei êđăp ênang, hgŭm mbĭt mđĭ kyar hlăm alŭ wăl, lehanăn tar rŏng lăn. Khua gĭt gai Đảng bi mni kơ klei trông čhai plah wah dua čô k’iăng khua lăn čar, lehanăn čang hmăng dua nah mâo klei bi mlih jăk, čŏng ngă bruă hŏng klei tŭ jing ya mta klei leh bi tŭ ư dua Đảng, dua ala čar, lŏ dơ̆ng hlăm klei bi mguôp dua ala čar hlăm anăn bruă kđi čar mtrŭn agha êlam hĭn, hgŭm kjăp kơ bruă lĭng kahan, bruă răng mgang klei êđăp ênang, lehanăn bruă hŏng tač êngao, bi hgŭm kjăp hĭn bruă duh mkra, dhar kreh, bruă sang hră mơar./.

 Y-Khem pô mblang