VOV4.Êđê- Aguah mbruê, Khua gĭt gai Đảng Nguyễn Phú Trọng ba anăp êpul ngă bruă mơ̆ng gưl dlông nao čuă, hơêč hmưi tết kơ bruă Đảng čar, bruă sang čư êa leh anăn mnuih ƀuôn sang čar Bắc Ninh. Blŭ hlăm mmông mă bruă anăn, Khua gĭt gai Đảng Nguyễn Phú Trọng mñă klă, čar Bắc Ninh čiăng lŏ hyuă kjăp hĭn, hâo hưn êlam hĭn hdră mtrŭn mơ̆ng klei kƀĭn kluôm bruă Đảng tal 13 leh anăn hdră mtrŭn hlăm klei kƀĭn kluôm bruă Đảng čar, ngă kơ hdră mtrŭn dưi ñu kma hlăm ai tiê kluôm bruă Đảng, mnuih ƀuôn sang leh anăn brei mnuih ƀuôn sang thâo săng klă ênŭm kơ klei găl, hmao kčưm mă leh anăn bi lar, dŭm klei dleh dlan, klei lông dlăng ciăng gĭr ktưn găn hgao.

Amâo dưi ngă ngơi mang, yap boh tŭ dưn dôk mâo jing dưi leh. Bruă Đảng čar čiăng mjêč ksiêm dlăng dŭm bruă pô dưi ngă leh, dŭm bruă ka dưi ngă, čiăng mơ̆ng năn, bi klă klơ̆ng hdră tă, bruă kñăm, bruă klam bi leh dŭm hdră êlan, hdră mkăp hŏng ai tiê gĭr ktưn, ngă bruă ktang phĭt hĭn, ktang hĭn, bi lar dŭm klei găl hlăm čar.

Pô mblang: Y-Ƀel Êban