Hruê 19/8, Ti anôk bi kƀĭn ala ƀuôn, ti ƀuôn prŏng Bắc Kinh, China, hlăm hdră nao čuă ala čar China hluê si klei iêo jak mơ̆ng khua gĭt gai China Tập Cận Bình, Khua gĭt gai Đảng, Khua lăn čar Tô Lâm bi tuôm leh hŏng Khua hlăm phŭn bruă kđi čar gưl dlông Đảng Cộng Sản China, khua Bruă Kƀĭn Ala China Vương Hộ Ninh.

Khua gĭt gai Đảng, Khua lăn čar Tô Lâm mñă ktang Đảng leh anăn knŭk kna Việt Nam dlăng yuôm bhăn bruă bi kjăp leh anăn mđĭ kyar klei mjĕ giăm hŏng Đảng leh anăn knŭk kna China, dlăng anei jing hdră êlan tal êlâo hlăm bruă hŏng tač êngao, Việt Nam tui tiŏ nanao hŏng hdră êlan sa China, sa ai hŏng China đĭ kyar ktang, bi lar bruă klam yuôm bhăn hŏng klei êđăp ênang, bi mguôp leh anăn đĭ kyar hlăm alŭ wăl leh anăn tar rŏng lăn. Sa ai hŏng klei hmăng hmưi leh anăn klei čiăng bi mguôp mơ̆ng Khua gĭt gai Đảng, Khua lăn čar Tô Lâm, Khua Bruă Kƀĭn Ala China Vương Hộ Ninh bi êdah China hmăng hmưi leh anăn mprăp mtrŭt mđĭ klei mjĕ êrô, klei bi trông dŭm gưl bruă plah wah dua ala čar, mtrŭt mđĭ klei bi mguôp hlăm djăp mta bruă, bi lar bruă klam gĭt gai mơ̆ng Dhar bruă bi mguôp dua tĭng China – Việt Nam.